Choose Language
Old Testament Books
New Testament Books
1Визьлыко кышномурт юртсэ кутыса возе,
нош укылтэм кышномурт сое ас киыныз куашкатэ.
2Шонерлыко сюрес вылтӥ мынӥсь мурт Кузё-Инмарлэсь кышка,
нош кинлэн улон сюресэз кырыж,
со Кузё-Инмар сярысь уг малпаськы.
3Укылтэмлэн кылыз – вылтӥяськонлэн сюлоез,
нош визьлыкоослэн кылзы-ымзы соосты уте.
4Ошъёс ке ӧвӧл, тусьёс бушесь;
ошъёс ке кужмоесь, трос пайда басьтыны луэ.
5Тодэмзэ-адӟемзэ шонер верась уг ӧрекчаськы,
нош адӟемзэ-тодэмзэ шонертэм верась алдаськон вӧлмытэ.
6Укылтэм улӥсь визьлыкез утча, но уг шедьты,
нош визьнодо муртлы тодон-валан капчиен сётӥське.
7Укылтэм адями дорысь палэнскы,
кинлэсь визьмо-нодо вераськемзэ уд кылӥськы.
8Визьлыко мурт сюрессэ тодэ, со бордын солэн визьлыкез,
нош малпаськытэк улӥсьлэн укылтэм ужез йыромонэ нуэ.
9Укылтэмъёс сьӧлыкез серекъяло,
нош шонер улӥсьёс пӧлын ӟеч эрик улэ.
10Сюлэм аслэсьтыз куректон-кайгузэ адӟе,
солэн шумпотон пӧлаз но уз пыриськы мукет мурт.
11Законлы пумит улӥсьёслэн юртсы куашкалоз,
нош шонер улӥсьёслэн юртсы узырмоз.
12Куд-ог сюресъёс адямилы шонересь кадь пото,
нош соос кулонэ нуо.
13Серекъяку но кытӥ-отӥ сюлэм висе,
шумпотон но кытӥ-отӥ ӝожомонэн йылпумъяське.
14Сӧриськем-азэм сюлэмо адями урод-лек ужъёсызлэн
емышъёсыныз кӧтсэ тыроз,
ӟеч мурт но аслаз улон сюрес вылаз будэтэм емышеныз
кӧтсэ тыроз.
15Укылтэм мурт котькыӵе но кыллы оске,
нош визьнодо адями улон сюрес вылаз сак улэ.
16Визьнодо мурт уродлэсь-леклэсь кышка, палэнске солэсь,
нош укылтэм мурт – керӟегъяськись,
ас вылаз оскиськыса улӥсь луэ.
17Керӟег мурт укылтэм уж лэсьтыны быгатэ;
тодыса вылысь юри урод-лек уж лэсьтӥсь – синазькыль мурт.
18Визьнодтэмъёс укылтэмлыкез асьсэлы люкетлы басьто,
нош визьнодоос тодонлыкен шобырско.
19Лек муртъёс лякыт муртъёслэн азязы йыбырттозы,
нош сьӧлыклэсь кышкасьтэмъёс шонер улӥсьлэн
капка азяз йырзэс мыкыртозы.
20Куанер-начар улӥсез матысьёсыз но синазькыль каро,
нош узырлэн трос эшъёсыз луо.
21Матысьсэ синазькыль карись сьӧлыка,
нош куанер улӥсез гажась-жалясь мурт шудо.
22Урод уж лэсьтыны малпасьёс уг янгышало-а?
[Урод лэсьтӥсьёс гажан-жалянэз, шонерлыкез уг тодо;]
гажан-жалян, шонерлык ӟеч малпасьёс дорын уло.
23Котькудӥз но уж табыш сётэ,
нош юнме супыльтон изъян гинэ вае.
24Узырлык – визьнодоослэн венец изьызы,
нош йӧнтэмъёслэн укылтэмлыксы укылтэмлык ик вань.
25Адӟемзэ-кылэмзэ шонер верась лулъёсты уте,
нош адӟемзэ-тодэмзэ шонертэм верась алдаськон вӧлмытэ.
26Кузё-Инмар азьын кышканэн улон – юн оскиськон,
Ас нылпиосызлы Со утиськон инты луэ.
27Кузё-Инмарлэсь кышкан – улон сётӥсь ошмес,
со кулонлэн сьӧлтэтъёсызлэсь палэнтэ.
28Трос калыкез луыку, эксэй бадӟымлыко луэ,
нош калыкез ӧжыт луыку, эксэй понна шугадӟон вуэ.
29Чидась муртлэн трос визьмыз,
нош керӟегъяськыса улӥсь аслэсьтыз укылтэм луэмзэ возьматэ.
30Бугыръяськисьтэм сюлэм мугорлэсь улонзэ кузятэ,
нош вожъяськон – лыосты сисьтэ.
31Куанер улӥсез ӝикатыса-ёртыса возись мурт
солэсь Кылдытӥсьсэ ултӥя,
нош Кылдытӥсез санэ понӥсь мурт ёрмыса улӥсьлы ӟеч лэсьтэ.
32Сьӧлыклэсь кышкасьтэм уродэз-лекез понна сэрпалтэмын луоз,
нош шонер улӥсьлэн кулон азяз но оскиськонэз вань.
33Визьлык визьнодо муртлэн сюлмаз улэ,
укылтэмъёс пӧлын но со ачиз сярысь тодытэ.
34Шонер улӥсь калык вылӥе ӝутске,
нош законлы пумит улӥсь калык ассэ сӥтэм-сантэм каре.
35Визьнодо ляльчилы эксэй ӟеч эриксэ возьматэ,
нош сое сантэмасьлы йыркурзэ кисьтэ.
Глава 14
