Choose Language
Old Testament Books
New Testament Books
1Визьлыко пи атаезлэсь визьмамзэ-нодъямзэ санэ понэ,
нош возьыттэм пи сьӧлыксэ-шексэ шарае поттэмез санэ уг поны.
2Ас ымызлэн емышезлэсь ӟечлыксэ адями веръялоз,
нош законэз сӧрыса улӥсьёслэн лулзы – уродэз-лекез шӧмъялоз.
3Кылзэ-ымзэ кутыны быгатӥсь мурт лулзэ уте,
нош ымзэ паськыт усьясь куректон-кайгу шедьтэ.
4Азьтэмлэн лулыз оломае но юнме кулэ каре,
нош сюлмолэн лулыз тыр улэ.
5Шонер улӥсь ӧрекчаськон кылэз синазькыль каре,
нош сьӧлыклэсь кышкасьтэм мурт ассэ ачиз сантэма,
возьытэ вуттэ.
6Шонерлык дун-шектэм муртэ сюрес вылаз уте,
нош сьӧлыклэсь кышкатэк улон йӧнтэм муртэ быдтэ.
7Куд-огез ассэ узыр мурт шуыса возьматыны тырше,
аслаз номыриз ке но ӧвӧл;
нош мукетыз ассэ куанер улӥсь шуыса возьматэ,
аслаз узырлыкез трос ке но.
8Узырлыкез вань ке, адями дун тырыса кышкатӥсьёслэн
киулысьтызы улонзэ мозмытыны быгатэ,
нош куанер муртэ кышкатон – юнме уж.
9Шонер улӥсьёслэн югытсы кема пиштэ,
нош сьӧлыклэсь кышкасьтэмъёслэн лампадазы чаль кысэ.
[Кескич муртъёслэн лулзы сьӧлыкъёс пӧлтӥ йыромыса ветлэ,
нош шонер улӥсьёс жаляло, ӟеч каро.]
10Вылтӥяськон бордысь тэрытэк улон потэ,
нош визь-кенешез кабыл басьтӥсьёс бордын визьлык улэ.
11Алекъяськыса люкам узырлык чаль быре,
нош ужаса поттэм ваньбур йылэ.
12Кема дыр ӵоже быдэсмисьтэм оскиськон сюлэмез шугъяськытэ,
нош быдэсмем малпан – улон писпу кадь шумпоттэ.
13Кин кылэз санэ уг поны, со аслыз изъян лэсьтэ;
нош курон-косонлэсь кышкась мурт доры ӟечлык вуоз.
14[Кескич пи дорын номыр ӟечез ӧвӧл,
нош визьмо ляльчилэн ужъёсыз азинлыкоесь луо,
сюресэз но шонер мынэ.]
15Визьлыко муртлэн дышетонэз – улон сётӥсь ошмес,
со кулонлэн сьӧлтэтъёсызлэсь палэнтэ.
16Ӟечлыко визьлык шумпотон вае,
нош сьӧлыклэсь кышкасьтэмъёслэн сюрессы туж лек-чурыт луэ.
17Котькудӥз визьмын улӥсь мурт тодыса ужзэ лэсьтэ,
нош укылтэм мурт укылтэм луэмзэ адӟиськон интые пуктэ.
18Урод сямо ыстэм мурт шугадӟон пӧлы сюре,
нош оскиськымон луись ыстэм мурт утиськон вае.
19Дышетонэз кулэтэм карись мурт куанер улон пӧлы,
сантэман пӧлы сюре,
нош визьмамез-нодъямез санэ басьтӥсь мурт – сӥё-дано луоз.
20Быдэсмем малпан луллы-сюлэмлы шумпотон вае;
нош укылтэмъёслэн лек ужъёссылэсь куштӥськемзы чик уг поты.
21Визьмо муртэн кусып возись ачиз но визьмо луоз,
нош укылтэм муртэн эшъяськись ачиз но сӧриськоз.
22Сьӧлыкоос бӧрсьын уродлык ветлэ,
нош шонер улӥсьёслы ӟечен пунэм берыктӥське.
23Ӟеч сюлэмо мурт нылпиезлэн нылпиосызлы но люкет кельтэ,
нош сьӧлыколэн узырлыкез шонер улӥсь понна возиське.
24Куанеръёслэн но бусыязы нянь удалтэ,
но радлык ӧвӧлысь куд-огез кулэ-быре.
25Ньӧрзэ жалясь мурт пизэ уг яраты,
нош кин пизэ яратэ, со ньӧрзэ кияз возе.
26Шонер улӥсь кӧттырымоназ сиське,
нош законлы пумит улӥсьёслэн кӧтсы сюмаса улоно луэ.
Глава 13
