Choose Language
Old Testament Books
New Testament Books
1Кин визьмамез-нодъямез яратэ, со тодон-валанэз яратэ;
нош кин сьӧлыксэ-шексэ шарае поттэмез синазькыль каре,
со укылтэм мурт.
2Ӟеч муртлы Кузё-Инмар ӟеч эриксэ возьматэ,
нош кескич адямиез Со судить кароз.
3Законлы пумит улыса, адями уз юнматскы;
шонер улӥсьёслэн выжызы уг вырӟылы.
4Ӟеч сямо кышно – картэз понна венец изьы;
нош возьытэ вуттӥсез – картэзлэсь лыоссэ сисьтэ.
5Шонер улӥсьёслэн малпанзы – шонерлык,
нош сьӧлыклэсь кышкасьтэмъёслэн – кескичлык.
6Сьӧлыклэсь кышкасьтэмъёслэн вераськонзы –
вир кисьтонлы дасям сьӧлтэт,
нош шонер улӥсьёслэн кылзы соосты, асьсэды, уте.
7Сьӧлыклэсь кышкасьтэм муртъёс борды шугадӟон йӧтӥськиз ке, –
соос ӧвӧл ини,
нош шонер улӥсьёслэн корказы вырӟылытэк сылэ.
8Адямиез визьмыз понна ушъяло,
нош сюлмыныз саптаськем муртэз гажась-яратӥсь ӧвӧл.
9Эсьмаса, огшоры мурт мед луод но ас вылад ужаса мед улод,
сӥё-даноос пӧлы пырыса, няньлы ёрмыса улытозь.
10Шонер улӥсь пудо-животэз сярысь но сюлмаське,
нош сьӧлыклэсь кышкасьтэмъёслэн сюлэмзы жалянэз уг тоды.
11Музъемзэ гырыса-кизьыса, утялтыса улӥсь мурт нянен тыр улэ;
нош кин шулдыръяськыса улӥсьёслэн сьӧразы мынэ,
со визьзэ ыштэм мурт.
[Вина юыса шумпотон басьтӥсь мурт
аслэсьтыз юртсэ сӥтэм-сантэм луонэ вуттэ.]
12Сьӧлыклэсь кышкасьтэм мурт шонер улӥсез
уродлыклэн сьӧлтэтаз кутыны тырше;
нош шонер улӥсьёслэн выжызы юн.
13Сьӧлыклэсь кышкасьтэмез кылыныз-ымыныз сьӧлыкакуз кутозы,
нош шонер улӥсь шугадӟон пӧлысь потоз.
[Лякыт синмын учкись муртэ гажало-жаляло,
нош кар капка дорын пумиськись мурт мукетъёссэ ӝикатэ.]
14Кыл-ымызлэн емышеныз адями ӟечлык басьтыса тыр луэ;
адямилы пунэм берыктӥське ас киызлэн ужъёсыз понна.
15Укылтэм муртлы аслаз сюресэз аслаз син азяз шонер потэ;
визь-кенешез кылзӥсь мурт – визьмо мурт.
16Укылтэм муртлэн йыркурез соку ик кыре потэ,
нош визьмо мурт ӝоже усемзэ ватэ.
17Тодэмзэ верась мурт, зэмлыкез вера,
нош адӟемзэ ӧрекчаськыса верасьлэн кылъёсыз – алдаськон.
18Юнме кыл тэкшерись пуртэн кадь вандэ,
нош визьмо муртлэн кылыз эмъя.
19Шонерлыкез верась ымъёс пумтэм вапумъёс уло,
нош ӧрекчаськись кыло мурт вакчи дыр гинэ улэ.
20Урод малпасьёслэн сюлмазы кескичлык улэ,
тупаса улон вайисьёслэн – шумпотон.
21Шонер улӥсь доры уродлык уз лыкты,
нош сьӧлыклэсь кышкасьтэмъёс уродлыкен пачылмыса улозы.
22Ӧрекчаськыса вераськись мурт Кузё-Инмарлы юрӟым потэ,
нош зэмлыкез верась муртъёс Инмарлы ярамонэсь.
23Визьмо адями тодон-валанзэ шарае уг потты,
нош укылтэмлэн сюлмыз ас укылтэмзэ шарае поттэ.
24Сюлмоослэн кизы кузёяськыса улоз,
нош азьтэм ки медъяськыса улыны кылёз.
25Сюлмын улӥсь ӝожлык адямиез зӥбыса возе,
нош ӟеч кыл сое шулдыртэ.
26Шонер улӥсь матысь муртэзлы ӟеч сюрес возьматэ,
нош сьӧлыклэсь кышкасьтэмъёслэн сюрессы йыромонэ пыртэ.
27Азьтэм муртлы пӧйшур уз сюры,
сюлмо муртлэн ваньбурез тырмыт.
28Шонерлыклэн сюрес вылаз – улон,
солэн ветлон интыяз кулон ӧвӧл.
Глава 12
