Choose Language
Old Testament Books
New Testament Books
1Шонертэм мертаськон Кузё-Инмар азьын юрӟым адӟиське,
нош шонер мертаськон Солы ярамон.
2Вылтӥяськон лыктӥз ке, возьытэ вуон но лыктоз;
зӥбыт-востэмъёсын ӵош визьлык лыктоз.
[Шонер улӥсь кулэ ке, сое жаляса буре ваё;
нош сьӧлыклэсь кышкасьтэмъёс шӧдтэк шорысь куло ке,
со понна шумпото.]
3Чылкыт сюлэмоослэн дун-шектэм улонзы соосын кивалтоз,
нош кескич муртъёсты кескич сямзы быдтоз.
4Вожпотон нуналэ узырлык уз юртты,
нош шонерлык кулонлэсь утёз.
5Дун-шектэм улӥсьлэн шонерлыкез солэсь сюрессэ ӵошкыт каре,
нош сьӧлыклэсь кышкасьтэм сьӧлыкъёсызлы луыса погра.
6Чылкыт сюлэмоослэн шонер улэмзы соосты утёз,
нош законэз сӧрисьёс законлы пумит улэмзы пӧлы сьӧлтаськозы.
7Сьӧлыклэсь кышкасьтэм кулэ ке, солэн оскиськонэз но ыше-быре,
законлы пумит улӥсьёслэн ӟечсэ возьманзы быре.
8Шонер улӥсь шугадӟонлэсь утиське,
нош солэн интыяз сьӧлыклэсь кышкасьтэм сюре.
9Чеберъяськись аслаз ымыныз матысьсэ вие,
нош шонер улӥсьёс шӧдон-валанэнызы утисько.
10Шонер улӥсьёс каньылэн улыку, город-кар шулдыръяське,
нош сьӧлыклэсь кышкасьтэмъёс кулыку,
шумпотон-шулдыръяськон луэ.
11Шонер улӥсьёслэн бакель каременызы город-кар вылӥе ӝутске,
нош сьӧлыклэсь кышкасьтэмъёслэн ымынызы – куашка.
12Вакчи визьем мурт адямиез синазькыль каремзэ шара возьматэ,
нош визьнодо адями шып улэ.
13Кыл нуллыса ветлӥсь мурт тодытыны лэзьымтэ ужез-кылэз
шарае поттэ,
нош оскиськымон мурт сыӵе ужез ватэ.
14Сюлмаськыса-тыршыса кивалтон ӧвӧл ке, калык погра,
нош визь-кенеш сётӥсьёс трос ке, калык ӟеч улэ.
15Мукет муртлэн пунэм басьтэмез понна кыл сётӥсь мурт
аслыз лек уж лэсьтэ,
нош кин кыл сётыса дурбасьтэмез синазькыль каре,
со доры кышкытлык уз вуы.
16Ӟеч сямо кышномурт [картэзлы] дан вае,
[нош шонерлыкез синазькыль карись кышномурт –
со возьыттэмлэсь но возьыттэм мурт.
Азьтэм муртъёс начар уло,] нош сюлмо муртъёс ваньбуро луо.
17Гажась-жалясь сюлэмо адями аслаз лулызлы ӟеч уж лэсьтэ,
нош чурыт сюлэмо адями лулмугорзэ куашкатэ.
18Сьӧлыклэсь кышкасьтэмлэн ужаса поттэмез ышоз-быроз,
нош шонерлыкез кизись бырисьтэм мед-кузьым басьтоз.
19Шонерлык улэп улонэ нуэ,
нош лек уж лэсьтыны тыршись мурт
аслаз кулонэз пала мыныны тырше.
20Кескич сюлэмо адямиос Кузё-Инмар азьын юрӟым макеос;
улон сюрессы вылтӥ дун-шектэм ветлӥсьёс Солы ярамонэсь.
21Кыл сётыса вераны луоз:
йӧнтэм адями вӧсь карон басьтытэк уз кыльы;
нош шонер улӥсьёслэн выжызы утиськоз.
22Кышномурт чебер, нош ачиз укылтэм ке,
со ныраз зарни кульчо понэм парсьлы укша.
23Шонер улӥсьёслэн мылкыдазы ӟечлык лэсьтон гинэ улэ,
нош сьӧлыклэсь кышкасьтэмъёслэн мылкыдазы вожпотон улэ.
24Одӥгез жалятэк сётъя но, солы со понна эшшо ватсаське на,
нош мукетыз укыр но укыр шыръяны яратэ, озьы ке но начарме.
25Ӟеч уж лэсьтӥсь тыр луоз, кин мукетъёслэсь сюзэс юзматэ,
солэсь аслэсьтыз но сюзэ юзматозы.
26Кин ас дораз ю-нянез кутыса-ватыса возе, сое калык карга,
нош ю-няньзэ вузасьлэн йыр вылаз бакельлык улэ.
27Ӟеч лэсьтыны тыршись Инмарлэсь ӟеч эриксэ утча;
уродлык утчась доры уродлык ачиз лыктэ.
28Аслаз узырлыкез вылэ оскиськись мурт усёз,
нош шонер улӥсьёс вож куар кадь вожектыса улозы.
29Аслэсьтыз юртсэ утисьтэм-чакласьтэм муртлэн люкетэз
тӧл кадь пазьгиське;
укылтэм мурт сюлмыныз визьлыко муртлы ляльчи луоз.
30Шонер улӥсьлэн емышез – улон писпу,
визьмо мурт адями лулъёсты ас палаз кыске.
31Музъем вылын шонер улӥсьлы тазьы пунэм берыктӥське ке,
соку сьӧлыклэсь кышкасьтэмлы, сьӧлыко муртлы
эшшо золгес пунэм берыктӥське.
Глава 11
