Choose Language
Old Testament Books
New Testament Books
1Соломонлэн мадёнъёсыз.
Визьлыко пи атайзэ шумпоттэ,
нош укылтэмез – анайзэ ӝоже уськытэ.
2Шонертэм амалэн люкам ваньбур пайда уг вайы,
нош шонерлык кулонлэсь-быронлэсь мозмытэ.
3Кузё-Инмар шонер улӥсез сютэм улыны уз кельты,
нош сьӧлыклэсь кышкасьтэмъёслэсь кулэ каронъёссэс Со палэнтоз.
4Азьтэм ки куанере вуттэ, нош сюлмоослэн кизы узырмытэ.
5Гужем люкась – визьмо пи, нош аран дыръя изись – укылтэм пи.
6Бакель каронъёс шонер улӥсьлэн йыр вылаз уло,
нош законлы пумит улӥсьлэн вераськоназ
урод-лек ужъёс ватӥськыса уло.
7Шонер улӥсез ӟечен буре ваёзы,
нош сьӧлыклэсь кышкасьтэмъёслэн нимзы сисьмоз-быроз.
8Сюлмыныз визьмо улӥсь мурт курон-косонъёсты кабыл басьтэ,
нош кылыныз-ымыныз укылтэм улӥсь мурт канжаське.
9Кин дун-шектэм улэ, со кышкатэк ветлэ;
кин сюрессэ мыдлане нуэ, со вӧсь каремын луоз.
10Кин синъёсыныз кескич кырмышъя,
со адямиослы куректон-кайгу вае,
нош кылыныз-ымыныз укылтэм улӥсь мурт канжаське.
11Шонер улӥсьлэн кылыз-ымыз – улон сётӥсь ошмес,
нош законлы пумит улӥсьлэн ымаз урод-лек ужъёс ватӥськыса уло.
12Адӟемпотостэм карон керетонъёсты ӝутэ,
нош яратон вань сьӧлыкъёсты шобыртэ.
13Визьмо муртлэн кылаз-ымаз визьлык улэ,
нош укылтэмлэн тыбыр вылтӥз ньӧр ветлэ.
14Визьлыко муртъёс тодон-валанэз утьыса возё,
нош укылтэмъёс кылынызы-ымынызы куашкан ваё.
15Узырлэн ваньбурез – кужмо город,
куанерлэн шугадӟонэз – начар улон.
16Шонер улӥсьлэн ужъёсыз улонэ нуо,
сьӧлыклэсь кышкасьтэмлэн азинлыкъёсыз сьӧлык люканэ нуо.
17Кин визьмамез-нодъямез санэ понэ,
со улонэ нуись сюрес вылын сылэ,
сьӧлыкъёссэ-шекъёссэ шарае поттонэз кулэтэм карись –
со йыромем мурт.
18Кин адӟемпотостэм каронзэ ватыса возе,
со кылыныз-ымыныз ӧрекчаськись мурт;
укылтэм мурт кыл нуллыса ветлэ.
19Трос вераськыку, сьӧлыклэсь утиськыны уд быгаты,
нош кылзэ кутыны быгатӥсь мурт, со – визьмо мурт.
20Шонер улӥсьлэн кылыз – быръем азвесь,
нош сьӧлыклэсь кышкасьтэмлэн сюлмыз номырлы ярантэм.
21Шонер улӥсьлэн кылыз трос адямиосты уте-возьма,
нош укылтэмъёс визьзы вакчиен куло-быро.
22Кузё-Инмарлэн бакель каронэз узырмытэ,
кӧтӝожъёсыз сьӧраз уг вайы.
23Укылтэм мурт йыруж лэсьтонэз шудон уж кожа,
нош визьмо мурт тодэ, мар со визьлык.
24Сьӧлыклэсь кышкасьтэм мурт малэсь кышка, со ик вуэ со доры,
нош шонер улӥсьёслэн кулэ каронзы быдэсмоз.
25Кызьы сильтӧл ортче-кошке,
озьы ик сьӧлыклэсь кышкасьтэм ыше-быре;
нош шонер улӥсь бырисьтэм инъет вылын сылэ.
26Азьтэм мурт сое ыстӥсьёс понна
пиньёслы уксус кадь ик, синъёслы ӵын кадь ик потэ.
27Кузё-Инмарлэсь кышкан улоно нуналъёсты йылэтэ,
нош сьӧлыклэсь кышкасьтэмъёслэн улоно аръёссы вакчиёмозы.
28Шонер улӥсьёсты шумпотон вите,
нош сьӧлыклэсь кышкасьтэмъёслэн оскиськонзы ыше-быре.
29Кузё-Инмарлэн сюресэз дун-шектэм улӥсь понна –
утиськон инты,
нош законлы пумит улӥсьёсты со кышкатэ-куалекъятэ.
30Шонер улӥсь ноку но уз шонаськы,
нош сьӧлыклэсь кышкасьтэмъёс музъем вылын кема уз улэ.
31Шонер улӥсьлэн ымыз визьлык поттэ,
нош лек-йӧнтэм кыл ӵогиськыса усёз.
32Шонер улӥсьлэн кылыз ӟечез тодэ,
нош сьӧлыкъёслэсь кышкасьтэмъёслэн ымзы йӧнтэмез,
сӧриськем кылъёсты гинэ тодэ.
Глава 10
