Choose Language
Old Testament Books
New Testament Books
1Визьлык аслыз корка пуктӥз,
вӧлэм сизьым юбоос вылэ сое юнматӥз.
2Курбонлы дасям пудозэ вандӥз, виназэ чашаын сураз,
сиён-юонзэ пуктылыса дасяз.
3Городлэн ӝужыт интыосысеныз ляльчиоссэ ялыны ыстӥз:
4«Визьнодтэмъёс, берытске!» Визьзы вакчи муртъёслы со вераз:
5«Чалелэ, сиелэ няньме, сураса дасям винаме юэлэ.
6Укылтэм улонлэсь куштӥське, кема улоды,
визьнодо улонлэн сюрес вылтӥз ветлэ».
7Возьытэз тодӥсьтэм муртэ визьмась адями сантэман улэ кыле;
сьӧлыклэсь кышкасьтэмез шекъёсыз понна шара пыкылӥсь
кайгу шедьтэ.
8Возьытэз тодӥсьтэм адямиез шекъёсыз понна шара эн пыкылы,
со тонэ адӟонтэм кароз;
визьнодо адямиез шекъёсыз понна шара пыкылы, со тонэ яратоз.
9Визьнодо адямиез визьма, со уката но визьмогес луоз,
шонер улӥсез дышеты, со тодонлыксэ будэтоз.
10Визьлыклэн кутсконэз Кузё-Инмарлэсь кышкан бордысь потэ;
Дун-Сьӧлыктэмез тодон – со визьлык.
11Мынам визь-кенешъёсыя улӥд ке, кема аръёс улод,
улон нуналъёсыд ватсаськозы.
12[Пие!] Визьлыко ке тон, аслыд ачид,
[матысьёсыдлы но] визьлыко луиськод;
тэрытскисьтэм ке тон, огнад чидано луод.
[Кин пӧяськон вылын возиське, со тӧлъёсты пастука,
лобась тылобурдоос сьӧрын уйылӥське:
уго со виноград садэзлэн сюрес вылысьтыз кошкиз но
бусыысьтыз пичи сюресъёс кузя йыромыса ветлэ;
вутэм луоё кыр дуннеетӥ, вутэк пашмыса кылёно
музъем вылтӥ ветлэ;
киыныз емыштэк кылёнэз бича.]
13Визьзэ ыштэм, куашетыны яратӥсь,
укылтэм, номыре но тодӥсьтэм кышномурт
14ӧс выжыяз пукон вылэ пуксе, городлэн ӝужытэсь интыосаз пуксе
15асьсэлэн сюрессы кузя шонерак мынӥсьёсты ас дораз ӧтьыны:
16«Кин укылтэм, татчы лыктэ!» Вакчи визьем муртлы но шуиз:
17«Лушкам ву ческыт йӧтэ, ватэм нянь но ческыт потэ».
18Солэсь кылзӥськись мурт уг тоды,
дунне пыдэслэн мурдалаяз кулэмъёслэсь лулъёссэс
со кышномурт ӧтиз шуыса.
[Нош тон тэтчыса кошкы, огинтыяд ӝегаса эн улы,
со кышномурт шоры учкыса эн улы;
уго соку тон мурт вуэз, мурт шурез выжыса кошкод.
Кема улэмед потэ ке, улоно аръёстэ йылэтэмед потэ ке,
мурт вулэсь палэнэ кошкы, мурт ошмесысь эн юы.]
Глава 9
