Choose Language
Old Testament Books
New Testament Books
1Визьлык уг-а вазиськы? Визь-нод уг-а будэты куаразэ?
2Со ӝужытэсь интыосы, сюрес дуръёсы, падвожъёсы султэ;
3каре пырон капкаос дорын, ӧс выжыосысен со ӧтьыса кесяське:
4«Адямиос, мон тӥледлы вазиськисько,
адями пиослы куараме поттӥсько!
5Нодтэмъёс, нодо луыны дышетске!
Укылтэмъёс, визьнодо луыны тырше!
6Кылзэлэ, уго мон тӥледлы туж кулэ луисьсэ верало,
мынам ымысьтым потэм кылъёс – шонер кылъёс;
7ымы зэмлык кылъёсты вералоз,
ӧрекчаськон кылъёслэсь ымы юрдэ,
8ымысьтым потэм кылъёс ваньмыз шонересь,
соос бордын кескичлыкез, ӧрекчаськонэз ӧвӧл;
9визьмо мурт понна соос ваньзы валамонэсь,
тодон-валан басьтэмъёс понна соос шонерлыкоесь.
10Азвесез эн басьтэ, мынэсьтым дышетонме кабыл басьтэ;
тодон-валан быръем чылкыт зарнилэсь но дуногес,
11визьлык марӟанлэсь но умойгес ук,
вань синмаськымон арбериос пӧлысь номыр но
соин ӵошатскыны уз быгаты.
12Мон, визьлык, визен-нодэн ӵош улӥсько но
малпаськытӥсь тодон-валанэз утчасько.
13Кузё-Инмарлэсь кышкан – со уродлыкез адӟемпотостэм карон;
вылтӥяськонэз, астэ вылӥ каронэз,
урод-лек ужъёсын тырмем улонэз, кескич кылэз-ымез
мон адӟемпотостэм карисько.
14Мон киын кенеш но зэмлык; мон визь-нод, мон киын – кужым.
15Мон пыр эксэйёс кузёясько, косъяськисьёс шонерлыкез юнмато;
16мон пыр кивалтӥсьёс но, кузёйыръёс но,
музъем вылысь вань судьяос но кивалто.
17Монэ яратӥсьёсты мон яратӥсько, утчась мурт монэ шедьтэ;
18узырлык но данлык, бырисьтэм ваньбур но шонерлык мон киын;
19мынам емышъёсы зарнилэсь, самой чылкыт зарнилэсь, но
умоесьгес,
быръем азвесьлэсь но бадӟымгес мынам сётэм пайдае.
20Шонерлыклэн, зэмлыклэн сюресъёссы кузя мон ветлӥсько
21монэ яратӥсьёслы ваньбур сётон понна,
ваньбур тыронъёссэс пачылмытон понна.
[Нуналлы быдэ луись ужъёс сярысь верам берам
уг вунэты вапумъёслэн кутсконысенызы луись ужъёс сярысь
радызъя тодытыны.]
22Самой кутсконаз ик, ваньзэ кылдытэмезлэсь азьвыл ик,
мон Кузё-Инмар бордын вал.
23Вапумъёс кутсконысен ик, музъемез кылдытэмлэсь азьло ик
мон вӧйын зырӟыса пуктэмын.
24Мон вордскыку, пыдэстэм ву дуннеос ӧй на вал,
трос вуо ошмесъёс но ӧй на вал.
25Мон вордски гурезьёсты, вырйылъёсты кылдытэмлэсь азьло,
26Кузё-Инмарлэн музъемез но, бусыосты но,
дунне вылысь нырысетӥ сюй пырыосты но
кылдытэмезлэсь азьло вордски.
27Инъёсты кылдытыны дасякуз, мон отын вал.
Пыдэстэм ву дуннелэн бам вылтӥз котыр гож лэсьтыкуз,
28вылӥе пилемъёсты пуктылыкуз,
пыдэстэм ву дуннелэсь ошмесъёссэ юнматыкуз,
29вуосыз сьӧраз медаз потэ шуыса зарезьлы пуктон-косон сётыкуз,
музъемлэсь инъетъёссэ тырыкуз,
30Со бордын мон кибашлы пуктӥськись-лэсьтӥськись вал,
котькуд нуналэ шумпотон вайи,
Солэн азяз вань вакытъёсы шулдыръяськыса улӥ.
31Кузё-Инмарлэн музъем вылаза шулдыръяськыса улыкум,
мон адями пиос пӧлын шумпотыса улӥ.
32Озьыен, пиналъёс, кылзэ монэ;
мынэсьтым сюресме утисьёс шудоесь!
33Визь-кенешъёсты пеляды понэ, визьлыкоесь луэ,
соос бордысь эн палэнске.
34Нуналлы быдэ капкае дорын йыг-йыг сылӥсь,
ӧсъёсы дорын возьмаськыса улӥсь, монэ кылзӥсь мурт шудо,
35малы ке шуоно кин монэ шедьтӥз, со улэп улонэз шедьтӥз,
Кузё-Инмар дорысь дэлет басьтоз,
36нош мыным пумит сьӧлыкась мурт аслаз лулызлы изъян вае:
ваньзы монэ адӟемпотостэм карись муртъёс кулонэз ярато».
*а 8:31 музъем вылаз – Синодальной берыктонын «кругез-питранэз вылын» шуэмын
Глава 8
