Choose Language
Old Testament Books
New Testament Books
1Пие! Мынэсьтым кылъёсме уть, курон-косонъёсме пушкад ват.
[Пие! Кузё-Инмарез данъяса ул, – соку юнмалод,
Солэсь сяна, нокинлэсь но эн курда.]
2Мынэсьтым курон-косонъёсме уть, ул,
мынэсьтым дышетонме но синчебердэ кадь утьыса ул.
3Чиньыосыд борды соосты дум,
сюлэм пулъёсыд борды соосты гожты.
4Визьлыклы тазьы шу: «Тон мынам сузэре!»
Визез-нодэз «аслам ӵыжы-выжые» шуыса нима,
5соос тонэ мукет муртлэн кышноезлэсь,
аслэсьтыз кылъёссэ небӟытыса вераськись
мурт кышномуртлэсь мед утёзы.
6Тани, одӥг пол мон решётка пыр
коркасьтым укно пыр учкыса улӥ но
7улонэз трос адӟымтэ пинал калык пӧлысь
одӥгзэ укылтэм пияшез адӟи:
8со падвожез кышномуртлэн корка сэрегез вӧзтӥ выжиз но
сюрес кузя солэн корка палаз мынӥз;
9ӝыт, ӝомал усем бере, пеймыт уе, тём-тём пеймыт вакытэ вал со.
10Но тани – солэн пумитаз кышномурт лыктэ,
калгись-юмшась кышномуртлэн чеберъянъёсыныз-дӥськутэныз
дӥсяськемын со,
кескич сюлмыныз-мылкыдыныз,
11куаш поттӥсь, возьытэз чик валасьтэм адями;
пыдъёсыз-кукъёсыз гуртаз уг уло:
12я ульчаысен, я падвожысен
вань сэрегъёсы сьӧлтэтъёс пуктылыса дася.
13Та пиез со кутӥз но чупаз,
возьыттэм ымнырын солы тазьы вераны кутскиз:
14«Туннэ мон тупаса улон понна курбон сётӥ:
туннэ мон сӥзиськонъёсме быдэстӥ;
15соин ик мон тынад пумитад потӥ
тонэ шедьтон вылысь, – шедьтӥ тонэ.
16Валесме дуно шобыръёсын, Египетысь ваем
пӧртэм буёло басмаосын чеберъяй;
17кӧлан интыме, смирнаен, алоен, корицаен пазяса,
ческыт зыно кари.
18Пыр мон доры, ӵукнаозь асьмеос ӟыгыръяськом-чупаськом,
яратыса кӧтмес тыром,
19малы ке шуоно кузпалы дорам ӧвӧл: со кузь сюрес вылэ потӥз;
20азвесь коньдонэн янчиксэ сьӧраз басьтӥз;
тыр толэзь ӝужан нуналэ со дораз бертоз».
21Трос верам лӥятӥсь кылъёсыныз та кышномурт
пияшез ас палаз кариз,
небыт кылыныз-ымыныз солэсь визьзэ тугаз.
22Та пияш соку ик кышномурт сьӧры мынӥз
ошлэн вандон интые мынэмез кадь,
[кызьы пуны мынэ жильыетаз],
кызьы пужей ассэ ыбон интые мынэ,
23пукыӵ ньӧл солэн мусаз мертчиськытозь мынэ;
кызьы тылобурдо пижны вылэ тэтче,
ачиз уг но тоды, сое быдтон понна со пуктэмын шуыса.
24Озьыен, пиналъёс, кылзэ монэ,
ымысьтым потэм кылъёсме пеляды понэ.
25Азэм кышнолэн сюрес вылаз сюлмыд медаз кыстӥськы,
солэн сюресъёсыз кузя йыромыса эн ветлы,
26малы ке шуоно троссэ со яраё карыса погыртӥз,
троссэ кужмо пиосмуртъёсты со виылӥз;
27солэн дорыз – адлэн пыдэсаз нуись сюресъёс,
соос кулонлэн пуш висъетъёсаз васько.
Глава 7
