Choose Language
Old Testament Books
New Testament Books
1Пие! Аслад матысед понна тон кыл сётӥд ке,
мукет мурт понна кидэ сётӥд ке,
2соку тон ас ымысьтыд потэм кылъёсыныд астэ ачид сьӧлтаськод,
ымысьтыд потэм кылъёсыд пыр тон кутэмын луод.
3Пие, тани тон мар лэсьты, – матыседлэн киулаз тон сюрид бере,
мын но матыседлэн пыд выжыяз пыдесъяськыса йыбыртты,
сое сюлворыса астэ мозмытыны кур.
4Синъёсыдлы изьыны маза эн сёты,
синлысъёстэ кырмышъяны эн лэзьы;
5кыркеч кадь киулэ сюронлэсь утиськы,
тылобурдо кутылӥсьлэн киулысьтыз тылобурдолэн
мозмытскемез кадь мозмытскы.
6Азьтэм, мын кузьыли доры,
солэн ужамез шоры учкы, визьлыко лу!
7Солэн кивалтӥсез но, эскерись-чакласез но, косӥсез но ӧвӧл,
8нош со гужем няньзэ дася, аран дыръя сиёнзэ бича.
[Яке, мын муш доры, тод, макем со ужез яратӥсь,
кыӵе сӥё-дано ужез со быдэсъя;
солэсь ужам ужзэ тазалыксэс юнматыны
эксэйёс но, огшоры адямиос но куто;
ваньмыз сое ярато, данъяло,
солэн кужымез бадӟым ке но ӧвӧл, нош визьлыкез синмаськымон.]
9Азьтэм, кытчыозь тон изёд на? Ку тон изён интыысьтыд султод?
10Ӧжытак изёд, ӧжытак нырулыса кыллёд,
ӧжытак гадь вылад киостэ тырыса кыллёд:
11соку, пыдйылчи кадь, куанер улонэд вуоз,
йырвандӥсь кадь, начар улонэд лыктоз.
[Нош азьтэмъяськыса ӧд ке улы,
соку, ошмесысь ву кадь, аран дырыд вуоз;
куанер-начар улонэд соку дорысьтыд кыдёке бызьыса кошкоз.]
12Кескич адями, сьӧлыклэсь кышкасьтэм мурт
кылыныз-ымыныз ӧрекчаськыса ветлэ,
13синъёсыныз кырмышъя, пыдъёсыныз кока,
чиньыосыныз пусъёс возьматэ;
14кескичлык солэн сюлмаз улэ:
котькыӵе дыре но со уродзэ-лексэ лэсьтыны малпа,
керетонъёс-даллашонъёс кизе.
15Со понна малпамтэ шорысь солэн кулонэз-куашканэз вуоз,
соку ик погыртэмын луоз – бурмемез уз лу ни.
16Тани куать – сое Кузё-Инмар синазькыль каре,
сизьым но Солы юрӟым потэ:
17синъёсыз вылтӥяськисесь, со ӧрекчаськись кыло,
киосыз янгыштэм вирез кисьто,
18сюлмыз лек малпанъёс дуре, пыдъёсыз сьӧсь уж доры ӝог бызё,
19со – ӧрекчаськыса ӧвӧлтэмзэ верась мурт,
агай-вынъёс куспы тупатэк улон кизись.
20Пие! Атаедлэсь косонъёссэ уть,
анаедлэсь визь-кенешъёссэ кулэтэм эн кары;
21пырак ӵожелы соосты сюлмад пырты, соосты чыртыяд дум.
22Кытчы ке мынӥд, соос тонэн кивалтозы;
изьыны выдӥд ке, тонэ возьмалозы;
сайкад ке, тонэн вераськыса улозы:
23уго курон-косон, со – лампада, визь-кенеш, со – югытлык,
индылонъёс-дышетонъёс, со – улонэ нуись сюрес,
24тонэ йӧнтэм кышномуртлэсь утён понна,
мурт кышномуртлэн кескич кылызлэсь утён понна.
25Солэсь чеберлыксэ сюлэмыд кулэ медаз кары,
[синъёсыныд кутэмын медад луы,]
синлысъёсыныз тонэ со ас палаз медаз кыскы,
26малы ке шуоно азыса-калгыса улӥсь кышномуртэн кусып возён
шорем нянь курон калэ вуытозь куанермытэ,
нош карто кышномуртэн калгон адямилэсь дуно лулзэ быдтэ.
27Кин ке но кутыса тылэз кунулаз поныны но
дэремзэ сутытэк кельтыны быгатэ-а?
28Кин ке но ӝуась эгыръёс вылтӥ ветлыны но
пыдъёссэ сутытэк кельтыны быгатэ-а?
29Озьы ик луэ матысезлэн кышноез доры пырась пиосмуртэн:
кин со кышномурт борды йӧтӥське, янгыштэк-шектэк уг кыльы.
30Лушкаськись мурт сютэм дыръяз
кӧтсэ тырон понна лушкаське ке,
сое вӧсь карытэк уг кельто,
31сюрем бераз сизьым полэс берыктоно луоз,
юртысьтыз ваньзэ, маиз вань, сётоно луоз.
32Бызем кышномуртэн азыса-калгыса улӥсьлэн визьмыз ӧвӧл;
тазьы улӥсь мурт лулзэ быдтэ:
33сое жугозы, возьытэ вуттылозы, сӥтэм-сантэм луонэз уз быры,
34малы ке шуоно вожан – со пиосмуртлэн йыркурезлэн пуштонэз,
пунэмзэ берыктыкуз, со уз жаля,
35уксёен-ваньбурен сое либатыны уд быгаты,
котькӧня кузьымъёс солы сёт, со уз буйгатскы.
Глава 6
