Choose Language
Old Testament Books
New Testament Books
1Пие! Визьлык кылъёсме санэ пон,
визь-нодэ пала пельдэ мыкырты,
2уждэ малпаськыса мед быдэсъялод,
кылыд-ымыд тодон-валанэз мед утёз.
[Чеберъяськись, кескич кышномуртлы эн оскы,]
3уго мурт кышномуртлэн ымысьтыз чечы потэ,
солэн вераськемез вӧйлэсь но небыт луэ,
4нош бӧрысь адӟонэд курытпот кадь кузял луоз,
мыд-мыд палтӥз вандӥсь мечлэсь но лэчыт луоз;
5солэн пыдъёсыз кулон доры васько,
пыдтышъёсыз дунне пыдэсэ вуо.
6Солэсь улон сюрессэ тодэмед потӥз ке но, тон сое уд тоды –
солэн сюресъёсыз ялан вошъясько.
7Озьыен, пиналъёс, монэ кылзэ,
мынам ымысьтым потэм кылъёслэсь эн палэнске.
8Сюресэд со калгись кышномуртлэн палэнэтӥз мед ортчоз,
солэн коркаезлэн ӧс дораз матаз но эн лыкты,
9кужымдэ мукетъёслы сётоно медад луы,
улон аръёсыд курадӟытӥсь кие медаз сюре;
10тынад кужыменыд муртъёс тыр медаз луэ,
ужам ужед мурт юртлы медаз мыны.
11Лулыд, мугорыд катьтэммем бере тон ӝуштыса улыны кутскод,
12соку тон шуод:
«Визь-нод сётэмез малы меда синазькыль карыса улӥ,
сьӧлыкъёсы понна пыкылэмзэс сюлмы малы меда кулэтэм кариз,
13дышетӥсьёсылэсь верамзэс санэ ӧй понылы,
визь-нод сётӥсьёсы пала пельме малы меда ӧй мыкыртылы:
14калык пӧлын, кенешон интыосын
ӧжыт гинэ уродлыкъёс пӧлы ӧй выйы!»
15Аслад ошмесысьтыд, гудӟемысьтыд бызись вуэз ю.
16Ошмес вуосыд ульчаос кузя [медаз] ӧръяське,
ву ӧръёсыд падвожъёс вылтӥ [медаз] бызе;
17соос тынад огнадлэн гинэ мед луозы,
тонэн ӵош мукетъёслэн соос медаз луэ.
18Тынад ошмесэд бакель каремын мед луоз; егит дыр кышноеныд,
19мылкыдэз лӧпкытӥсь пужеен, туж чебер кыркечен майбыр ул;
солэн гадьёсыз котькыӵе но дыре мылкыддэ мед ӝутозы,
солэн яратонэныз шумпотыса-куаныса ул.
20Пие, малы тон мурт кышномуртъёслы синмаськыса улыны,
муртлэсь гадьёссэ кырмаса улыны кулэ?
21Адямилэн сюресъёсыз Кузё-Инмарлэн син азьтӥз ортчо уго,
солэсь вань сюресъёссэ Со эскере-чакла.
22Законлы пумит улӥсез аслаз законлы пумит улэмез кутэ,
ас сьӧлыкезлэн жильыетаз со возиське:
23со, индылонъёс басьтытэк, кулэ,
аслаз укылтэмъяськонъёсыз пӧлы йыроме.
Глава 5
