Choose Language
Old Testament Books
New Testament Books
1Нылпиос, атайдылэсь дышетэмзэ-валэктэмзэ санэ понэ,
визьлы-нодлы мед дышоды, кылзэлэ,
2уго мон тӥледлы ӟеч дышетонэз тодытӥ.
Курон-косонъёсы бордысь эн палэнскылэ.
3Мон но уго атаелэн вордэм пиез вал,
анаелэн одӥг гинэ мусо пиез вал,
4атае монэ дышетыса возиз, мыным шуылӥз:
«Мынам кылъёсы сюлмад мед возиськозы;
курон-косонъёсме утьыса ул.
5Визьлык люка, визь-нод люка: тае эн вунэты,
мынам ымысьтым потэм кылъёсты кулэтэм эн кары.
6Визьлыклэсь эн палэнскы, со тонэ утёз;
яраты сое, со тонэ чакласа возёз.
7Визьлык люка, со ваньмызлэсь бадӟымез,
вань узырлыктэ визь-нод люканэ пон.
8Вылӥ дунъя визьлыкез, со тонэ сӥё-дано кароз;
со борды лякиськид ке, со тонэ данэ поттоз;
9йыр вылад чебер тугоко поноз,
тыныд синмаськымон венец изьы изьыялоз».
10Пие, кылзы монэ, верам кылъёсме кабыл басьты, –
соку тынад улоно нуналъёсыд йылозы.
11Мон тыныд визьлыклэсь сюрессэ возьматӥсько,
шонер сюресъёс кузя тонэ нуисько.
12Мыныкуд ӝикатэмын-ёртэмын уд луы,
бызьыса мынӥд ке но, уд канжаськы.
13Дышетон-нодъян бордын юн возиськы, эн куштӥськы солэсь,
уть сое, малы ке шуоно со – тынад улонэд.
14Сьӧлыклэсь кышкасьтэмъёслэн сюрес вылазы эн султы,
уродъёслэн-лекъёслэн сюрес вылтӥзы эн ветлы.
15Со сюреслэсь палэнскы, со вылтӥ эн ветлы,
кож со вылысь, палэнтӥз ортчы;
16малы ке шуоно соос урод уж уг ке лэсьто, умме уг усё;
адямиез погыртон калэ уг ке вутто, умзы ыше-быре;
17уго соос законлы пумит улонлэсь няньзэ сиё,
лек улонлэсь виназэ юо.
18Шонер улӥсьёслэн сюрессы – пиштыса улӥсь шунды кадь,
нунал вордӥськемъя со югытгес но югытгес луэ.
19Нош законлы пумит улӥсьёслэн сюрессы – пеймытлык кадь;
соос уг тодо мар борды канжаськемзэс.
20Пие! Верам кылъёсме санэ пон,
верам кылъёсы пала пельдэ мыкырты;
21тынад син азьысьтыд соос медаз кошке;
сюлэм пушкад возь соосты,
22малы ке шуоно соосты шедьтӥсь муртлы соос улон сёто,
быдэс мугорызлы тазалык ваё.
23Вань утёноос пӧлысь тужгес но сюлэмдэ уть,
малы ке шуоно отысь пото улон ошмеслэн сиосыз.
24Кылыныд-ымыныд ӧрекчаськонэз бордысьтыд палэнты,
кылыдлэсь кескичлыксэ бордысьтыд улля.
25Синъёсыд шонерак мед учкозы,
синлысъёсыд азьпалзэ меӵак учкыса мед улозы.
26Пыдыныд лёгиськон сюресэд сярысь малпа,
вань сюресъёсыд юнэсь мед луозы.
27Бурпала но, паллян пала но эн кожылы;
уродлэсь-леклэсь пыддэ палэнты,
28[малы ке шуоно шонер сюресъёсты Кузё-Инмар чакла-уте,
нош паллянъёсыз сюресъёс – со сӧриськем сюресъёс.
29Нош Со тынэсьтыд сюресъёстэ шонертоз,
каньыллык сётыса, ветлон сюрестэ тупатоз-интыялоз.]
Глава 4
