Choose Language
Old Testament Books
New Testament Books
1Пие! Мынэсьтым визьмамме-нодъямме эн вунэты,
тынад сюлмад мынам курон-косонъёсы мед возиськозы,
2уго соос трос, кема улон нуналъёс, аръёс, каньыллык
тыныд ватсалозы.
3Гажан-жалянэн зэмлык тон дорысь медаз ыше-быре:
соосын чыртыдэ дум, сюлэм вылад соосты гожты,
4соку Кузё-Инмар дорысь, адямиос дорысь
гажан-жалян, ӟечлык шедьтод.
5Вань сюлмыныд Кузё-Инмарлы оскиськы,
визьмыд вылэ эн пыкиськы.
6Быдэс улон-вылонэд ӵоже Кузё-Инмарез тодыны тыршы,
Со тынэсьтыд сюресъёстэ шонертоз.
7Астэ ачид визьмо шуыса эн малпа;
Кузё-Инмарлэсь кышка но уродлэсь-леклэсь палэнскы:
8со тынад мугорыдлы тазалык сётоз, лыостэ эмъялоз.
9Ас ваньбуреныд Кузё-Инмарез сӥлы кар,
нырысь вуэм емыштэ Солы вай.
10Соку кеносъёсыд ваньбурен мултэс луытозь пачылмозы,
виноград лёган гуосысьтыд выль вина пальккаськыса потоз.
11Пие, Кузё-Инмарлэсь вӧсь каронзэ кулэтэм эн кары,
янгышъёстэ-шекъёстэ шарае поттӥз ке, ӝоже эн усьы;
12Кузё-Инмар уго кинэ яратэ, сое ик вӧсь но каре,
атай но пиезлы ӟеч каре, сое со визьма.
13Визьлык шедьтэм мурт шудо, визь-нод басьтэм адями шудо, –
14уго визьлык люкан азвесь басьтонлэсь умойгес,
зарнилэн сярысь табышез бадӟымгес:
15дуно изъёслэсь но со дуногес;
[нокыӵе уродлыклэн но солы пумитъяськемез уг луы;
солэн матаз лыктӥсьёслы со ваньмызлы тодмо,]
одӥгез но кулэ каронэд соин ӵошатскыны уз быгаты.
16Кема улон аръёс – солэн бур кияз,
нош паллян кияз – байлык но данлык;
[солэн кылысьтыз-ымысьтыз шонерлык потэ;
законъя улонэз, гажан-жалянэз со кыл вылаз нуллэ.]
17Визьлыклэн сюресъёсыз – кельшымон сюресъёс,
вамышъян интыосыз каньыллыкоесь.
18Визьлык басьтӥсьёс-шедьтӥсьёс понна – со улон писпу луэ,
шудоесь сое утьыса улӥсь муртъёс.
19Кузё-Инмар бадӟым визьлыкен музъемез кылдытӥз,
визьмын инъёсты юнматӥз.
20Солэн бадӟым визьлыкеныз пыдэстэм ву дуннеос усьтӥськизы,
инъёс лысвузэс виято.
21Пие! Визьлыко лу, малпаськыса уждэ лэсьты,
син азяд та визьмо улон сямъёсты возь,
22соку соос лулыдлы улэп улон сётозы, чырты котырдэ чебертозы.
23Соку кышкатэк сюрес кузяд вамыштод, пыдыд уз канжаськы.
24Изьыны выдӥд ке, уд кӧшкема; умме усид ке, капчи уммен изёд.
25Шӧдтэк шорысь вуэм кышкатонъёслэсь,
сьӧлыклэсь кышкасьтэмъёслэн быдтыны малпанзылэсь уд курда;
26малы ке шуоно Кузё-Инмар тынад оскиськон интыед луоз,
канжаськонлэсь пыддэ утёз.
27Киыдлэн лэсьтыны кужымез вань дыръя
ёрмыса улӥсьёслы ӟеч уж лэсьтонлэсь эн палэнскы.
28Сётыны луонлыкед вань дыръя эшедлы тазьы эн шуы:
«Мын, собере лыкты, ӵуказе мон сёто».
[Уго тон уд тодӥськы, мар ваёз ӵуказе нунал.]
29Матысед тонэн валче кышкатэк улон дыръя
солы пумит урод уж лэсьтыны эн малпа.
30Адями тыныд номыр уродзэ лэсьтымтэ дыръя
соин керетыса эн улы.
31Кужмысь урод лэсьтӥсьлы эн вожъяськы,
солэсь одӥгзэ но сюрессэ аслыд эн бырйы;
32малы ке шуоно азыса-сӧриськыса улӥсьёс
Кузё-Инмар азьын юрӟым адӟисько,
нош шонер улӥсьёсын Со кусып возе.
33Сьӧлыклэсь кышкасьтэмлэн юрт вылаз
Кузё-Инмарлэн карганэз улэ,
нош шонер-чылкыт улӥсьёслэсь улон интызэс Со бакель каре.
34Сантэмасьёсты Кузё-Инмар серем каре,
нош зӥбыт-востэм улӥсьёслы дэлет сётэ.
35Визьлыкоос данлык басьто, нош нодтэмъёс сӥтэм-сантэме кылё.
Глава 3
