Choose Language
Old Testament Books
New Testament Books
1Пие! Мынэсьтым кылъёсме кабыл басьтӥд ке,
курон-косонъёсме утьыса возид ке,
2визьлыкез валаны пельёстэ сак карид ке,
малпаськыса улон пала сюлэмдэ берыктӥд ке,
3тодон-валанлы вазиськид ке, визь-нодэз ӧтид ке,
4азвесез кадь сое утчад ке,
дуно ваньбурез кадь сое шедьтыны тыршид ке,
5соку Кузё-Инмарлэсь кышканэз тодод,
Инмар сярысь тодонэз шедьтод.
6Уго визьлыкез Кузё-Инмар сётэ,
Солэн кыл-ымысьтыз тодонлык но визь-нод пото.
7Шонер улӥсьёслы Со утиськон дасяса возе;
дун-шектэм улӥсьёслы Со – щит;
8Со шонерлыклэсь сюресъёссэ уте,
дун-чылкыт улӥсьёсызлэсь сюрессэс возьма.
9Соку тон шонерлыкез валалод, шонер судэз, дун-шектэм улонэз –
вань ӟеч сюресъёсты тодод.
10Визьлык сюлмад пырем бере,
тодон-валан тынад лулыдлы кельшиз ке,
11соку малпаськыса улон тонэ утёз, визь-нод возьмалоз тонэ
12урод сюресэ кожонлэсь, пӧяськись-алдаськись адямилэсь утёз,
13пеймытлыклэн сюресъёсыз кузя ветлон понна
шонер сюрес вылысь кожисьёслэсь,
14кинъёс урод ужъёс лэсьто но солы шумпото,
юрӟым азон-калгон ужзылы куано,
15кинъёслэн сюресъёссы кырыжесь,
кинъёс сюрес вылтӥзы йыромыса ветло.
16Визьлык тонэ утёз мукет муртлэн кышноезлэсь,
калгись кышномуртлэсь, аслаз кылыныз кӧясь-вӧясьлэсь,
17аслэсьтыз кузпалзэ ӧрекчаса возисьлэсь,
Инмарлэсь сӥзён-косонзэ вунэтӥсь муртлэсь.
18Солэн корказ пыран кулонэ нуэ,
солэн сюресъёсыз кулэмъёс пӧлы мыно.
19Со кышномурт доры пырамъёс пӧлысь нокин но
берен уг ни берытскы,
улон сюрес вылэ уг ни султы.
20Со понна ик ӟеч адямиослэн сюрес вылтӥзы ветлы,
шонер улӥсьёслэн сюрес вылазы возиськы,
21малы ке шуоно шонер улӥсьёс музъем вылын улозы,
дун-шектэм муртъёс отын улозы,
22нош законлы пумит улӥсьёс музъем вылысь быдтэмын луозы,
кескич муртъёс отысь выжыенызы порылэмын луозы.
Глава 2
