Choose Language
Old Testament Books
New Testament Books
1Израильысь Давид эксэйлэн Соломон пиезлэн мадёнъёсыз,
2соос гожтэмын визьлыкез, дышетонэз-нодъянэз тодон понна,
визьлыклэсь веранъёссэ валан понна;
3визьнодо улонлэсь курон-косонъёссэ кабыл басьтон вылысь,
шонер суд ортчытон вылысь, шонерлыко, зэмлыко улонэз
тодон понна;
4огшоры муртъёслы – нодлык,
егит пилы тодон, визьлыко улон сётон понна;
5визьлыко мурт кылзӥськоз но тодон-валанзэ будэтоз,
нодо мурт визьлыко визь-кенешъёс шедьтоз,
6мадёнэз но, котыръяса веранэз но,
визьлыко муртъёслэсь кылъёссэс но
соослэсь мадиськонъёссэс но валаны кутскоз.
7Визьлыклэн кутсконэз
Кузё-Инмарлэсь кышканэн улон бордысь потэ;
[ваньмызлэн ӟеч валанэз, кин сое уте;
нош Инмарлы тэрытскон – валанлэн кутсконэз;]
укылтэмъёс гинэ визьлыкез, дышетонэз-нодъянэз синазькыль каро.
8Пие, атаедлэсь нодъямзэ кылзы,
анаедлэсь дышетэмзэ кулэтэм эн кары,
9малы ке шуоно со – йырдэ туж чебер карись тугоко,
чыртыдэ чебер карись маке.
10Пие! Сьӧлыкоос асьсэ пала берыктыны выризы ке,
соосын огкылысь эн кариськы;
11шуизы ке: «Ойдо ми сьӧры,
янгыштэм, дун-шектэм муртэз виыны
ватӥськон инты дасяломе, лушкемен возьмаса уломы;
12пыдэстэм дунне кадь улэпкын соосты ньыломы,
шайгуэ васькисьёсты кадь быдэскынызы ньыломы;
13пӧртэм пумо дуно ваньбуръёс люкаломы,
таласа поттэм ваньбурен юртъермес тырмытомы;
14милемын ӵош пус чӧлтод,
асьмелэн ваньмылэн ваньбур возён кеносмы огазьын луоз».
15Пие! Соосын одӥг сюрестӥ эн ветлы,
соослэн сюрес вылазы султонлэсь пыддэ уть,
16уго соослэн пыдъёссы лек уж доры бызё, вир кисьтыны дырто.
17Вань тылобурдоослэн син азязы юнме казь кыско,
18нош сьӧлыкоос соослэсь вирзэс поттон понна
ватӥськон инты дасяло,
соослэсь лулзэс кутыны возьмаськыса уло.
19Ваньмызлэн, муртлэсь ваньбурзэ басьтэмез потӥсь муртлэн,
таӵе сюресэз:
муртлэсь ваньбурзэ киултӥсьлэсь со улонзэ тала.
20Визьлык ульчаысен шара ивортэ, падвожъёсысен куаразэ будэтэ,
21калык люкаськон интыосын тодытэ,
кар капкаосы пырон доръёсын со вераське:
22«Укылтэмъёс, укылтэм улонэз кема-а яратоды на?
Керетӥсь-даллашисьёс, керетон-даллашон пӧлазы кема-а
шумпотыса улозы на?
Вакчи визьёс, тодон-валанэз синазькыль карыса, кема-а улозы на?
23Сьӧлыкъёстэс шарае поттэмме кылзӥське:
тани, мон тӥ вылэ духме лэзё, верано кылъёсме иворто.
24Мон ӧти, нош тӥ ӧд кылзӥське;
киме мычыса улӥ, но монэ санэ понӥсь ӧй вал.
25Мынэсьтым вань визь-кенешъёсме палэнтӥды,
сьӧлыкъёстэс-шекъёстэс шарае поттэмме кабыл ӧд басьтэ.
26Со понна курадӟон тӥ вылэ вуиз ке, мон серекъяло;
шимес адӟонъёс тӥ доры вуизы ке, шумпото.
27Тӥ доры сильтӧл кадь шимес адӟон лыктоз,
тӧлпери кадь шугадӟон тӥ доры вуоз.
Куректон-кайгу, ӝикаса улон тӥ доры вуизы ке,
28соку тӥ монэ, визьлыкез, ӧтьыны кутскоды,
но мон тӥледыз уг кылы;
ӵукнаысен ик монэ утчалоды, но уд шедьтэ.
29Со понна уго со:
тодон-валанэз синазькыль каремды понна,
Кузё-Инмарлэсь кышканэз бырйымтэды понна,
30мынэсьтым визь-кенешъёсме кабыл басьтымтэды понна,
сьӧлыкъёстэс-шекъёстэс шарае поттэмме кулэтэм каремды понна;
31ас ужъёстылэсь емышъёссэс сиёды,
малпанэныды-мылкыдыныды кӧттэс тыроды,
32малы ке шуоно укылтэмъёсты вогъяськыса улэмзы виёз,
вакчи визьёсты сюлмаськытэк-тыршытэк улэмзы быдтоз,
33нош мынэсьтым верамме кылзӥськыса улӥсь мурт
уродлэсь кышкатэк, куалекъятэк, каньылэн улоз».
Глава 1
