Bible
Choose Language
Old Testament Books
New Testament Books
ПСАЛТИРЬ
91-тӥ ПСАЛОМ
1Крезьгур. Суббота нуналэ кырӟан.
2Макем ӟеч, Кузё-Инмаре, Тонэ данъяса улыны,
Тынэсьтыд нимдэ, Вылысь Инмаре, данъяса кырӟаны!
3Макем ӟеч Тынэсьтыд гажан-жаляндэ ӵук ӟардонысен тодытыны,
бер уёзь зэмлыктэ ивортылыны,
4дас сиё шудонэн, псалтирен но крезен кырӟаса вераны.
5Тон, Кузё-Инмаре, Ас ужъёсыныд мылкыдме ӝутӥд,
киыныд лэсьтэм ужъёслы шумпотыса кырӟасько.
6Макем быдӟымесь Тынад ужъёсыд, Кузё-Инмаре!
Паймымон муресь малпанъёсыд!
7Йӧнтэм адями сое уг тоды, укылтэм мурт сое уг вала.
8Сьӧлыклэсь кышкасьтэмъёс,
законлы пумит улӥсьёс турын кадь ӝужало,
сяськаясько пырак ӵожелы бырон понна,
9Тон, Кузё-Инмаре, пумтэм вапумъёсы ваньмызлэсь вылӥын!
10Тынад тушмонъёсыд, Кузё-Инмаре, тани, тушмонъёсыд быро,
законлы пумит улӥсьёс ваньзы пазьгисько.
11Мынэсьтым кужымме Тон кыр ошлэсь сюрзэ кадь
вылӥе ӝутӥськод,
мон выль вӧен зырӟемын.
12Тушмонъёсылэсь пограмзэс ас синмыным адӟисько,
пельыным кылӥсько мыным пумит султӥсь
сьӧсь мылкыдоос сярысь.
13Шонер улӥсь пальма кадь сяськаяське,
Ливанысь кедырпу выллем вылӥе ӝутӥське.
14Кузё-Инмарлэн корказ мерттэмъёс
Инмармылэн азбаръёсаз сяськаяло.
15Пересьмыса но соос емыш вайисесь,
куасьмисьтэмесь, шуясьтэмесь луо,
16Кузё-Инмар шонерлыко шуыса иворто.
Со – мынам юнматскон интые, Со бордын шонертэм улон ӧвӧл.
Глава 91
