Bible
Choose Language
Old Testament Books
New Testament Books
ПСАЛТИРЬ
89-тӥ ПСАЛОМ
1Инмар адямилэн Моисейлэн вӧсяськонэз.
2Кузё-Инмаре! Тон милям выжыысь выжые утиськон интымы.
3Гурезьёс вордскемлэсь,
музъемез но дуннеез кылдытэмедлэсь азьло,
даурысь дауре Тон – Инмар.
4Адямиез сисьмон интыяз вайиськод но шуиськод:
«Адями пиос, берытскелэ!»
5Тынад син азяд сюрс ар но толло нунал кадь гинэ ортчиз,
уйин возьмаськонлэн одӥг люкетэз кузьда гинэ со.
6Тудӟыса кошкись вуосты кадь Тон улон нуналъёсмес нуиськод,
соос уйвӧт кадесь, турын кадесь, кудӥз вазь ик ӝужа,
ӵукна сяськаяське, вожектэ, нош ӝытазе ӵогиське но куасьме со.
7Вожед потыку, быриськомы,
йыркуред потон дыръя куалектӥськомы.
8Законлы пумит улэммес Ас азяд пуктӥд,
лушкем сьӧлыкъёсмес ымнырыдлэн югытэз азе понӥд.
9Вань нуналъёсмы вожпотон улсад ортчизы;
лулӟиськем куара кадь аръёсмы ышо-быро.
10Улоно даурмы сизьымдон ар мында,
кужмоосызлэнгес – тямыстон ар;
улонмылэн ӟеч адӟонэз – секыт уж, висён-курадӟон.
Нуналъёсмы ӝог ортчо-кошко,
асьмеос но кошкиськомы-лобиськомы.
11Кин тодэ вожпотонэдлэсь кужымзэ,
йыркуредлэсь кышкытлыксэ кин быгатоз мертаны?
12Визьмо улон понна
нуналъёсмес шонер лыдъяны дышеты милемыз.
13Берытскы, Кузё-Инмаре! Кема на-а? Аслэсьтыд ляльчиостэ жаля.
14Аслад гажан-жалянэныд ӵукна ик кӧтмес тыр но,
ми вань нуналъёсмы ӵоже шумпотыса, шулдыръяськыса уломы.
15Курадӟон чидам нуналъёсмы мында
шулдыр нуналъёстэ милемлы сёт.
16Аслэсьтыд уждэ ляльчиосыдлы возьматы,
соослэн нылпиоссылы Аслэсьтыд дандэ усьты.
17Инмармылэн Кузё-Инмарлэн ӟеч эрикез ми бордын мед улоз,
ужъёсмылы азинлык сёт, ужъёсмылы азинлык сёт.
Глава 89
