Choose Language
Old Testament Books
New Testament Books
1Езрахи Ефамлэн дышетонэз.
2Гажан-жаляндэ, Кузё-Инмаре,
пумтэм вапумъёс ӵоже данъяса кырӟало,
выжыысь выжые зэмлыктэ кылыным-ымыным верало.
3Шуисько: пумтэм вапумъёслы гажан-жалян кылдытэмын,
зэмлыкед Инме юнматэмын, Тон шуид:
4«Сӥзён-косонме быръем муртэлы сётӥ, Давид ляльчиелы сӥзи:
5Выжыдэ пумтэм вапумъёслы юнмато,
престолдэ выжыысь выжылы пукто».
6Кузё-Инмаре, Тынэсьтыд паймымон ужъёстэ инъёс данъялозы,
зэмлыктэ святойёслэн люкаськоназы ушъялозы.
7Уго инмын кинэ Кузё-Инмарен ӵошатыны луоз?
Инмар пиос*а пӧлын кин Кузё-Инмарлы тупамон?
8Святойёслэн быдӟым люкаськоназы Инмар кышкыт,
Солэн котыраз вань улӥсьёслы Со шурдыт.
9Кузё-Инмаре, ин кужымъёслэн Инмарзы!
Кин Тон кадь кужмо, Кузё-Инмаре? Зэмлыкед котырад улэ.
10Зарезьлэн кужымез Тынад киулад,
лекъяськись тулкымъёсты Тон чусомытӥськод.
11Пограм муртэз кадь Раавез сузмытӥд,
кужмо суйбыгытэныд тушмонъёстэ пазьгид.
12Инъёс – Тынад, музъем – Тынад;
дуннеез но маиз отын вань, Тон пуктӥд-кылдытӥд.
13Уйпалэз но, лымшорез но Тон кылдытӥд;
Фаворен Ермон Тынад нимыдлы шумпото.
14Суйбыгытэд юн, киыд кужмо, бур киыд ӝутэмын!
15Престолэдлэн инъетэз – шонер суд, шонер улон;
гажан-жалян но зэмлык Тынад азьтӥд ветло.
16Гумы куараен ӟечкыланэз тодӥсь калык шудо!
Кузё-Инмаре, ымнырыдлэн югыт азьтӥз соос ветло.
17Нунал лумбыт Тон бордын шумпотыса соос уло,
шонерлыкед соосты вылӥе ӝутэ.
18Тон соослэн кужым басьтон, данъяськон интызы;
ӟеч эрик сётэменыд, кужыммы юнма.
19Кузё-Инмар – милям дурбасьтӥсьмы,
Израильлэн Святоез – милям эксэймы.
20Куке но адӟон пыр Тон святоедлы верад:
«Кышкасьтэмлы Мон юрттӥськи, калыке пӧлысь быръемез ӝутӥ.
21Аслэсьтым ляльчиме, Давидэз, шедьтӥ, святой вӧйыным сое зырӟи.
22Мынам киы сое зол кутыса возёз, суйбыгытэ сое юнматоз.
23Тушмон уз вормы сое, законлы пумит улӥсьлэн пиез уз ёрты сое.
24Тушмонъёссэ солэн азяз погырто,
синазькыль карисьёссэ куашкато.
25Зэмлыке но, гажан-жалянэ но со бордын улоз,
Мынам нимыным солэн кужымез юнмалоз.
26Солэсь кизэ зарезь вылэ поно, бур кизэ – шуръёс вылэ.
27Со Мыным вазиськоз: ”Тон мынам Атае,
мынам Инмаре, мынам утиськон изгурезе”.
28Мон сое нырысь вордскем нуны каро,
музъем выл эксэйёслэсь ваньзылэсь вылӥ каро.
29Пумтэм вапумъёс ӵоже сое гажаса-жаляса возё,
сӥзён-косонэ со дорын оскиськымон улоз.
30Солэсь выжызэ пумтэм вапумъёс улӥсь каро,
престолзэ но инлэсь нуналъёссэ кадь кузято.
31Солэн пиосыз законме куштӥзы ке, курон-косонъёсыя ӧз ке улэ,
32пуктон-косонъёсме сӧризы ке, Мынэсьтым косонъёсме ӧз ке уте,
33законлы пумит улэмзы понна корт бодыен тышкало,
шонертэм улэмзы понна вӧсь каро.
34Нош гажан-жалянме со бордысь уг басьты,
зэмлыклэсь уг куштӥськы.
35Сӥзён-косонме уг сӧры, ымысьтым мар потӥз, солэсь уг куштӥськы.
36Мон – дун-сьӧлыктэм, одӥг пол кыл сётӥ: Давидэз уг ӧрекча.
37Солэн выжыез пумтэм вапумъёс ӵоже улоз,
престолэз, шунды кадь, азям пиштоз.
38Пумтэм вапумъёс ӵоже, толэзь кадь, со юн сылоз;
инмысь адӟись – оскиськымон».
39Нош Тон вӧйын зырӟыса пуктэмедлы вождэ поттӥд,
сое палэнтӥд, синазькыль карид.
40Ляльчиедлы сётэм сӥзён-косондэ кулэтэм карид,
солэсь эксэй изьызэ муз вылэ сэрпалтӥд.
41Солэсь вань борддоръёссэ куашкатӥд,
изкаръёссэ куашкам из люкъёслы пӧрмытӥд.
42Сюрес кузя вань мынӥсь-ветлӥсьёс сое таркало,
бускельёсыз азьын со серекъян-веранлы пӧрмиз.
43Солы пумит улӥсьёслэсь бур кизэс вылэ ӝутӥд,
вань тушмонъёссэ шумпоттӥд.
44Палашезлэсь лэчыт йылзэ куасалтӥд,
ожмаськон дыръя солы ӧд юртты.
45Пиштон-чилянзэ быдтӥд, престолзэ музъем вылэ кымалтӥд.
46Егит дырызлэсь нуналъёссэ вакчиятӥд,
возьдаськонэн сое шобыртӥд.
47Кузё-Инмаре, кема-а ватӥськыса улод на,
тыл кадь ялан ӝуаса улоз на-а вожпотонэд?
48Тодад вай, кыӵе мынам улон дауре:
оло, юнме гинэ Тон вань адямиосты кылдытӥд?
49Кин адямиос пӧлысь улӥз но кулонэз ӧз адӟы,
ад пыдэслэн киызлэсь лулзэ мозмытӥз?!
50Кузё-Инмаре, кытын азьвыл гажан-жалянэд?
Давидлы Тон оскымон кылдэ сётӥд.
51Кузё-Инмаре, тодад вай, кужмо калыкъёслэсь милемыз,
ляльчиостэ, ултӥяса воземзэс, сое мон ас сюлмам нуллӥсько.
52Тушмонъёсыд кыӵе урод кылъёс верало, Кузё-Инмаре,
макем сантэмало
Тынэсьтыд вӧйын зырӟыса пуктэмедлэсь вамышъёссэ.
53Пумтэм вапумъёсы дано мед луоз Кузё-Инмар!
Аминь, аминь.
*а 88:7 Инмар пиос – татын: кылчинъёс (ангелъёс)
Глава 88
