Bible
Choose Language
Old Testament Books
New Testament Books
ПСАЛТИРЬ
87-тӥ ПСАЛОМ
1Кырӟан. Корей пиослэн крезьгурзы. Хорлэн кивалтӥсезлы. Махалаф шудонэн. Езрахи Еманлэн дышетонэз.
2Кузё-Инмаре, монэ утись Инмаре!
Нуназе но, уйин но Тон азьын тэльмырыса куриськисько.
3Вӧсяськеме Тынад азяд мед вуоз вал, куриськемме санэ пон.
4Лулы курадӟонъёс пӧлы ёрмиз, улонэ ад пыдэслэн матаз вуиз.
5Шайгуэ понэмын ни шуыса, монэ лыдъяло,
кужымез бырем мурт кадь мон луи.
6Кулэмъёс пӧлы куштэм, шайгуын кыллисьёс кадь мон луи,
кудъёссэ Тон буре уд ни вайиськы, кудъёсыз Тынад киулысьтыд сэрпалтэмын.
7Тон монэ дунне пыдэслэн гопаз, пеймыт азе, пыдэстэм гуэ куштӥд.
8Вожпотонэд монэ куасалтӥз,
вань тулкымъёсыныд Тон [монэ] ӝокатӥд.
9Вань тодмоосме бордысьтым палэнтӥд,
соос азьын монэ юрӟымлы пӧрмытӥд;
мон пытсамын, потэме уг луы ни.
10Куректыса-кайгырыса жадизы ни синъёсы;
нунал лумбыт Тон азьын вӧсяськи,
Кузё-Инмаре, Тон пала киосме ӝутыса улӥ.
11Кулэмъёслы Тон паймымон ужъёс лэсьтод шат?
Кулэмъёс султозы но Тонэ данъялозы шат?
12Гажан-жалянэд, оло, шайгуын-а ивортылэмын луоз,
зэмлыкед – сисьмыса кыллён интыын-а?
13Оло, пеймыт азьын-а тодозы Тынэсьтыд паймымон ужъёстэ,
шонерлыктэ – вунӥсь музъемын-а?
14Нош мон Тыныд, Кузё-Инмаре, вӧсяськисько,
вӧсяськеме ӵукна вазь ик Тон доры вуэ.
15Кузё-Инмаре, малы лулме кулэтэм кариськод,
ымнырдэ мынэсьтым ватӥськод?
16Мон шудтэм, пинал дырысеным каньсырай ни,
кышкатонъёсыд пӧлын улыса катьтэмми ни.
17Тынад вожпотонэд мон вылтӥ ортчиз,
кышкатонъёсыд монэ куасалтӥзы.
18Котькуд нуналэ, ву кадь, соос монэ котырто,
ваньзы ӵош монэ ӝикато.
19Мон бордысь эшме, матысьме палэнтӥд,
тодмоосме но адӟыны уг ни луы.
Глава 87
