Bible
Choose Language
Old Testament Books
New Testament Books
ПСАЛТИРЬ
82-тӥ ПСАЛОМ
1Кырӟан. Асафлэн крезьгурез.
2Эй, Инмаре! Вазьылытэк эн улы, куаретытэк эн улы,
каньыл кариськыса эн улы, Инмаре!
3Тани, Тынад тушмонъёсыд куаш потто,
Тонэ синазькыль карисьёс йырзэс ӝутӥзы.
4Калыкедлы пумит кескич ужрад малпазы,
Тон бордын утиськыса улӥсьёслы пумит кенеш ортчыто.
5Шуизы: «Ойдолэ мыноме но
Израилез калыкъёс пӧлысь выжытэм быдтоме,
азьланяз солэсь нимзэ тодазы но медаз ни вае».
6Огкылысь вераськизы, Тыныд пумит эштос*а кылдытӥзы
7Едомлэн юртъёсыз но измаил калык, Моав но агарян муртъёс,
8Гевал но Аммон, Амалик,
филистим муртъёс Тирын улӥсьёсын валче.
9Ассур но соос борды лякиськиз;
Лот пиослы соос юрттӥськись луизы.
10Мадианлы, Сӥсаралы, Иавинлы Киссон ӧр дурын мар лэсьтӥд,
соослы но озьы ик лэсьты.
11Соос Аендорын быдтэмын вал, музъемлы кыед луизы.
12Соослэсь покчи эксэйёссэс Оривен Зӥвез кадь ик кар,
вань азьветлӥсьёссэс но Зевеен Салманэз кадь ик кар.
13Соос шуылӥзы уго:
«Инмарлэсь улон интыоссэ киуламы басьтомы».
14Эй, Инмаре! Тӧлпери пушкысь тузон кадь,
тӧл азьысь куро кадь соос мед луозы.
15Кызьы тыл нюлэсэз сутэ, гомась тыл гурезьёсты ӵушка,
16озьы Аслад сильтӧлэныд соосты улля,
тӧлпериеныд соосты шуге-леке вутты.
17Кузё-Инмаре, Тынэсьтыд нимдэ мед утчалозы шуыса,
соослэсь улон азьзэс сӥтэм-сантэм кар.
18Мед возьдаськозы, пумтэм дауръёс ӵожелы шуге-леке мед кылёзы,
сӥтэм-сантэм мед луозы, мед бырозы.
19Мед тодозы, Тон Одӥгнад – Кузё-Инмар,
быдэс музъем выллы Вылысь Инмар луиськод шуыса.
*а 82:6 эштос – союз; объединение
Глава 82
