Bible
Choose Language
Old Testament Books
New Testament Books
ПСАЛТИРЬ
80-тӥ ПСАЛОМ
1Хорлэн кивалтӥсезлы. Геф шудонэн. Асафлэн крезьгурез.
2Юнматскон интымылы, Инмарлы, шумпотыса кырӟалэ,
Иаковлэн Инмарезлы вормон гурдэс кырӟалэ!
3Псалом гуръёс мытэ, тимпан шукке,
чебер куараё крезен, псалтирен шудэ.
4Выль толэзь ӝужаку, тупатэм дыре,
праздник нуналамы, гумыен пелляса шудэлэ.
5Та Израиль понна закон луэ Иаковлэн Инмарезлэн курон-косонэз.
6Тае Со Иосифлы быдэстон понна сётӥз –
Египет музъемысь потыкуз,
таӵе тодмотэм кыл куара кылыкуз:
7«Солэн пельпум вылысьтыз секыт ныпъетсэ басьтӥ,
киосыз корзинаос бордысь мозмытскизы.
8Шугадӟон дыръя тон Монэ ӧтид но, Мон тонэ мозмытӥ;
гудыри пушкысь тонэ кылӥ;
Мериваысь ву дурын тонэ эскери-чаклай.
9Кылзӥськы, калыке, Мон тыныд шара иворто.
Израиль! Тон Монэ кылзӥськысалыд ке!
10Мукет инмаред тынад медаз луы, мурт инмарлы эн йыбыртъя.
11Мон – Кузё-Инмар, Египет музъемысь поттэм Инмаред;
усьты ымдэ, Мон сое тыр каро».
12Нош калыке Мынэсьтым куараме ӧз кылзӥськы,
Израиль Мыным ӧз тэрытскы.
13Соин ик Мон соосты вог сюлэмо луэмзы понна куштӥ,
ас тодэмзыя мед ветлозы.
14Эй, Мынам калыке Монэ кылзӥськысал ке,
Израиль Мынам сюрестӥм ветлысал ке!
15Тушмонъёссэс Мон ӝог зӥбломытысал,
соосты ёртыса возисьёс вылэ киме урдысал.
16Кузё-Инмарез синазькыль карисьёс
Со азьын тэрытскыса улысалзы пумтэм вапумъёс ӵоже.
17Мон соосты чабейлэн вӧйыныз сюдысал,
изгурезьысь чечыен кӧтсэс тырысал.
Глава 80
