Choose Language
Old Testament Books
New Testament Books
Асафлэн дышетонэз.
1Калыке, кылзы мынэсьтым дышетэмме,
ымысьтым потӥсь кылъёс пала пельдэс мыкыртэ.
2Мадён вераны кутско, вашкала вакытысь визьмо веранъёсты усьто.
3Мар но ми ӧм кылэ, мар но ӧм тодэ,
милям атайёсмы мар но милемлы ӧз вералэ!
4Соослэн нылпиоссылэсь ум ватэ,
вуоно выжыослы Кузё-Инмарлэсь данзэ, Солэсь кужымзэ,
Солэсь лэсьтэм паймымон ужъёссэ ивортомы.
5Иаковлы Со курон-косон вайиз, Израильлы закон сётӥз,
атайёсмылы асьсэлэн нылпиоссылы со сярысь вераны косӥз.
6Лыктӥсь выжы, вордӥськоно нылпиос мед тодозы,
соос но, дыр вуиз ке, асьсэлэн нылпиоссылы мед вералозы шуыса,
7Инмар вылэ оскиськыса мед улозы;
Инмарлэсь ужъёссэ вунэтоно ӧвӧл, Солэсь курон-косонъёссэ утёно.
8Атайёсмылы укшаны уг яра –
вогъяськись, бугыръяськись выжылы, сюлмынызы радъяськымтэ,
духенызы Инмарлы оскиськымон луымтэ муртъёслы.
9Ефрем пиос, ожмаськон тӥрлык кутэмъёс, пукыӵен ыбылӥсьёс,
ож нуналэ берлань чигназы.
10Соос Инмарлэсь сӥзён-косонзэ ӧз уте,
Солэн законэзъя улонлэсь куштӥськизы;
11соослы возьматэм ужъёссэ, паймымон ужъёссэ, соос вунэтӥзы.
12Египет музъем вылын, Цоан бусыын,
атайёсмылэн син азязы Со паймымон ужъёс лэсьтӥз.
13Зарезез шори люкиз но соосты со пыр поттӥз,
вуосты борддорез кадь султытӥз.
14Нуназе соосты пилем сьӧрын нуиз,
нош быдэс уй ӵоже тыллэн югытэзъя валтӥз;
15кыр дуннеысен изэз шори ӵогиз –
быдӟым пыдэстэм гуысь кадь потӥсь вуэн соосты сектаз.
16Изгурезьысь ву ӧр поттӥз – шур кадь вуос бызьыны кутскизы.
17Нош соос Вылысь Инмар азьын ялан сьӧлыкаса улӥзы на,
кыр дуннеысен Солэсь вожзэ поттыса улӥзы.
18Асьсэлэн кӧтсылы-сюлэмзылы кельшись сиён курыса,
сюлмынызы Инмарлэсь визьзэ сынаса улӥзы,
19Инмарлы пумит кылъёс вераса шуизы:
«Кыр дуннеын Инмар сиён-юонэн ӝӧк пуктыны быгатоз-а?»
20Тани, Со из вылэ шуккиз но,
вуос бызьыны кутскизы, шуръёс ӧръяськизы.
«Быгатоз-а Со нянь сётыны,
быгатоз-а Аслаз калыкезлы сӥль сётыны?»
21Кузё-Инмар кылӥз но йыркурен ӝуатскиз,
Иаков пушкы тыл кенжиз, Израиль вылэ йыркур ӝутскиз,
22Инмарлы оскымтэзы понна,
Солэн утёнэзлы оскиськымтэзы понна.
23Йылысен Со пилемъёслы косӥз но инлэсь ӧссэ усьтӥз,
24соос вылэ, сиыны шуыса,
маннаез зор вуэз кадь кисьтӥз, соослы ин нянь сётӥз.
25Кылчинъёслэсь няньзэс адями сииз,
соослы Со кӧтсы тырымон сиён ыстӥз.
26Инмын шундыӝужанысь тӧлэз Со ӝутӥз,
Аслаз кужмыныз лымшор тӧлэз поттӥз.
27Тузонэз выллем соос вылэ сӥль кисьтӥз,
зарезь луоез выллем кыр тылобурдоосты вайиз.
28Юртъёссы вӧзы, котыртэм шоразы соосты уськытылӥз.
29Соос сиизы, кӧтсы тыриз; соослы мар кулэ вал, ваньзэ сётӥз.
30Соослэн копаськон мылкыдзы ӧз на ортчы вал,
сиёнзы ымазы на вал,
31Инмарлэн вожпотонэз соос вылэ вуиз,
самой куаем муртъёссэс вииз,
Израильлэсь егит пиоссэ уськытъяз.
32Озьы ке но соос эшшо сьӧлыкаса улӥзы на,
Солэн паймымон ужъёсызлы ӧз оске.
33Соослэсь нуналъёссэс алекъяськон пӧлын быдтӥз,
улоно аръёссэс – кышкан-куалекъян пӧлын.
34Соосты виылыны кутске ке вал, соку соос Сое утчаны кутскылӥзы,
Солы вазиськылӥзы, вазь ӵукнаысен ик Инмар доры лыктылӥзы.
35Тодазы вайизы, Инмар соослэн утиськон интызы,
Вылысь Инмар соослэн Мозмытӥсьсы шуыса.
36Ымынызы Со азьын чеберъяськизы,
нош кылынызы Со азьын пӧяськылӥзы.
37Сюлэмзы Со азьын чылкыт ӧй вал,
Солэн сӥзён-косонэзлы соос оскиськымонэсь ӧй вал.
38Нош Со гажаса-жаляса соослэсь сьӧлыксэс куштылӥз,
ӧз быдтылы соосты;
трос пол Аслэсьтыз йыркурзэ кысылӥз,
вань вожпотонзэ ӧз поттылы.
39Со тодаз возиз, соос лулмугор, лулбус луо шуыса,
кудӥз кошке но уг ни берытскы.
40Кӧня пол кыр дуннеысен соос Солы пумитъяськылӥзы,
тырттэм дуннеын Солэсь вожзэ поттылӥзы!
41Нош ик Инмарлэсь визьзэ сынаса улӥзы,
Израильлэн Святоезлэсь вожзэ поттылӥзы.
42Солэн киыныз лэсьтэм ужез тодазы ӧз ни вае,
ултӥян улысь мозмытэм нуналзэ но вунэтӥзы,
43куке Со Египетын паймымон тодметъёс лэсьтылӥз,
Цоан бусыын паймымон ужъёс возьматӥз.
44Юыны медаз быгатэ шуыса, шуръёссэс, ӧръёссэс вирлы пӧрмытӥз.
45Соос вылэ нымы-кибыосты ыстӥз – соос лекаськизы,
эбекъёсты лэзиз – соос изъян вайизы.
46Музъем вылысь будосъёссэс гоно нумыръёслы сётӥз,
ужам ужзэс – саранчалы.
47Виноградзэс йӧзорен шуккиз, сикоморпузэс пужмерен шобыртӥз.
48Пудооссэс йӧзор улэ сётӥз,
пудо уллёоссэс чилекъясь тыл улэ кельтӥз.
49Соос вылэ йыркурезлэсь гомась тылзэ, вожпотонзэ, лекомонзэ,
курадӟон, лек кылчинъёслэсь уллёзэс ыстӥз.
50Йыркурзэ соос вылэ кисьтӥз, лулъёссэс кулонлэсь ӧз ни утьы,
урод черен соосты погыртӥз.
51Египетысь ваньзэ нырысь вордскем нуныосты быдтӥз –
Хамлэн юртысьтыз кужымлэсь кутсконзэ.
52Ыжъёсты музэн Со калыксэ нуиз,
пудо уллёез кадь соосты кыр дуннеетӥ валтӥз.
53Шурдытытэк соосты нуиз, соос ӧз кышкалэ,
тушмонъёссэс зарезь ву ӝокатӥз.
54Аслаз святой музъемаз соосты вайиз,
бур киыныз басьтэм гурезь йылэ.
55Син азьысьтызы калыкъёсты улляз,
соослэсь музъемзэс люкетлы сётӥз,
Израиль выжыосты соослэн юртъёсазы улыны интыяз.
56Нош соос Инмарлэсь Вылысь Инмарлэсь ялан визьзэ сыназы,
Солы пумитъяськылӥзы, Солэсь косонъёссэ кулэ ӧз каре.
57Атайёссы кадь чигналлязы, куштӥськылӥзы,
кырыжмем пукыӵ кадь берлань берытскылӥзы.
58Курбон сётон гурезьёсынызы Солэсь вожзэ поттылӥзы,
вӧлыса лэсьтэм сульдэръёсынызы Солэсь йырзэ кур карылӥзы.
59Инмар кылӥз но йыркурен ӝуатскиз, Израильлы туж вожзэ поттӥз;
60Сӥломысь вӧсяськон тылысысь,
калык пӧлын улон юртысьтыз Со кошкиз.
61Аслэсьтыз кужымзэ пленэ кельтӥз, данзэ тушмонлэн киулаз сётӥз.
62Калыксэ палаш улэ сётӥз, быръем люкетэзлы йырзэ кур кариз.
63Солэсь егит пиоссэ тыл ньылылӥз,
егит нылъёсызлы сюан гуръёс ӧз кырӟалэ.
64Священникъёсыз палаш улын бырылӥзы,
палкышноосыз бӧрдыны ӧз быгатэ.
65Соку Кузё-Инмар кӧлэмысь выллем султӥз,
винаен вормем батыр кадь,
66нош тушмонъёссэ берласянь погыртӥз,
пырак ӵожелы серекъян-веранлы соосты кельтӥз.
67Иосифлэсь юртсэ кулэтэм кариз, Ефремлэсь выжызэ ӧз бырйы.
68Бырйиз Иудалэсь выжызэ,
синмаськем Сӥон гурезез Аслыз бырйиз.
69Ин кадь ӝужыт вӧсяськон инты пуктӥз,
музъемез кадь сое пырак ӵожелы юнматӥз.
70Со бырйиз Давидэз, Аслэсьтыз ляльчизэ,
ыж гид азбарысь сое басьтӥз,
71Аслэсьтыз калыксэ, Иаковез, Аслэсьтыз люкетсэ, Израилез,
возьманы ыжпи нонтӥсьёс пӧлысь сое вайиз.
72Чылкыт сюлмыныз соосты со возьмаз,
визьмо киосыныз соосты нуллӥз.
Глава 77
