Bible
Choose Language
Old Testament Books
New Testament Books
ПСАЛТИРЬ
73-тӥ ПСАЛОМ
Асафлэн дышетонэз.
1Эй, Инмаре, малы милемыз пырак ӵожелы палэнтӥд?
Аслад возь вылысьтыд ыжъёслы малы йыркуред ӝуатскиз?
2Тодад вай али
вашкала дырысен Аслыд карем, люкетлы басьтэм калыктэ,
та Сӥон гурезез, кудӥз вылэ Тон улыны интыяськид.
3Дауръёсын куашкатъям юртъёс доры матэ кар вамышъёстэ:
вӧсяськон интыысь тушмон ваньзэ куашкатӥз.
4Калыкедлэн люкаськон интыяз тушмонъёсыд вузо;
тодметъёсмы интые асьсэлэсь пусъёссэс пуктӥзы.
5Тугаськем писпу вайёсты кораны тӥр ӝутӥсьлы укшась луэмзэс
соос возьматӥзы.
6Отысь вань вӧлыса чеберъямъёссэ тӥрен, бердышен куашкатӥзы.
7Вӧсяськон интыез тылын сутӥзы;
Тынад нимыдлы сӥзем улон интыез чылкак саптазы.
8Асьсэлэн сюлмазы шуизы: «Соосты быдэсак таркалом», –
музъем вылысь Инмарлы сӥзем ваньзэ люкаськон интыосты сутӥзы.
9Паймымон тодметъёсты ум ни адӟиське, пророк но ӧвӧл ни,
талэсь кытчыозь кыстӥськемзэ но тодӥсь ми пӧлын ӧвӧл ни.
10Эй, Инмаре, Тынэсьтыд нимдэ тушмон кема-а саптаса возёз на,
пумитъяськыса улӥсь пумтэм вапумъёс ӵоже сое курлалоз на-а?
11Аслэсьтыд кидэ, бур кидэ малы палэнтӥськод?
Пушкысеныд куашкаты соосты.
12Эй, Инмаре, дауръёслэн кутсконысенызы ик мынам Эксэе,
музъем выллэн шораз утиськон тупатӥсь!
13Аслад кужыменыд Тон зарезез шортӥз люкид,
вуысь кыйёслэсь йыръёссэс сузмытъяд.
14Левиафан кыйлэсь йырзэ сузмытӥд,
кыр дуннеын улӥсь [эфиоп] калыклы сое сиёнлы сётӥд.
15Ошмесэз но шур вуэз ӵогыса поттӥд,
кужмоесь шуръёсты Тон куасьтӥд.
16Нунал но Тынад, уй но Тынад;
югдытӥсь макеосты, шундыез Тон юнматӥд.
17Музъемлэсь вань пумъёссэ Тон пуктӥд,
гужемез но толэз кылдытӥд.
18Тодад вай тае: Кузё-Инмар сярысь тушмон урод кылъёс вера,
визьзэс ыштэм адямиос Тынэсьтыд нимдэ курлало.
19Кыр дыдыкедлэсь лулзэ пӧйшуръёслы эн сёты;
начар муртъёстэ пырак ӵожелы эн вунэты.
20Аслад сӥзён-косонэд шоры учкы,
уго музъем вылысь вань пеймыт азьёс
законлы пумит улон юртъёсын пачылмизы.
21Ултӥям мурт сӥтэм-сантэм луыса медаз берытскы,
кураськись мурт, начар мурт Тынэсьтыд нимдэ мед ушъялозы.
22Эй, Инмаре, султы, дурбасьты Аслад ужедлы,
тодад вай визьзэ ыштэмлэсь нуналлы быдэ Тонэ курламзэ.
23Тушмонъёсыдлэсь черекъямзэс эн вунэты;
Тыныд пумит султӥсьёслэн куаш поттэмзы
дугдылытэк ӝутӥськылэ.
Глава 73
