Choose Language
Old Testament Books
New Testament Books
Асафлэн крезьгурез.
1Израильлы, чылкыт сюлэмоослы Инмар макем ӟеч!
2Нош мон – ӧжытак гинэ пыдъёсы либрак ӧз луэ,
ӧжытак гинэ пыдъёсы ӧз волегӟе –
3сьӧлыклэсь кышкасьтэмъёслэсь азинлыкен улэмзэс адӟыса,
визьзэс ыштэмъёслы мон вожъяськи.
4Соослэн уго кулытозязы курадӟонъёссы ӧвӧл,
соослэн тазалыксы юн.
5Адямиосын одӥг кадь уг ужало,
мукет адямиос кадь соос уг курадӟо.
6Соин ик вылтӥяськон соосты чыртывесь кадь бинялтӥз,
жалянэз валатэк улонэн, дӥськутэн кадь, соос шобырскизы.
7Куаеменызы синъёссы мыльккиськыса уло,
сюлмазы кескич малпанъёс бугыръясько.
8Ваньзэ унь-мань каро,
сьӧлыклэсь кышкатэк, кыл вӧлдо, вылтӥяськыса верасько.
9Ымзэс инбам пала ӝуто, нош кылзы музъем вылтӥ гыж ветлэ.
10Соин ик Солэн калыкез отчы ик берытске но пачыл чашаен ву юэ.
11Шуо: «Инмар кызьы тодоз? Вылысь Инмарлэн вань-а тодонэз?»
12Тани, та сьӧлыклэсь кышкасьтэмъёс
таяз дуннеын майбыр уло, узырлыксэс будэто.
13[Мон шуи:] «Озьыен, мон юнме гинэ сюлэмме ӧй дунматылы-а,
дун-шектэм луыса вылысь киосме юнме ӧй миськылы-а?
14Нуналлы быдэ асме яраё карыны ӧй сётылы-а,
ӵукналы быдэ шекъёсме шарае ӧй поттылы-а?»
15Нош мон шуысал ке: «Тазьы малпасько», –
соку Тынад нылпиосыдлэн выжызы азьын мон янгыш луысал.
16Кызьы меда тае валано шуыса, мон малпай;
но мон понна со секыт вал,
17Инмарлы вӧсяськон интые пырытозям но
соослэн улонзылэсь пумзэ валатозям.
18Тон соосты гылыт сюрес вылэ пуктӥд
пыдэстэм гуэ сэрпалтон понна.
19Син куспын соос номыртэк кылизы ук,
кышкаса улонлы чидатэк, ышизы, быризы!
20Сайкан азьысь уйвӧтэз кадь, озьы Тон, Кузё-Инмаре,
соосты сайкатод но быдтод соослэсь малпанъёссэс.
21Сюлмы писыръяса улыку, сюлмы-кӧты инты шедьтытэк улыку,
22мон номыр но валасьтэм-тодӥсьтэм вал,
Тон азьын мон пудо выллем маке вал.
23Нош мон котьку но Тонэн, Тон монэ бур китӥм кутыса возиськод.
24Визь-кенеш Тон мыным сётӥськод, данлыке монэ нуиськод.
25Тон сяна, кин вань на мыным инмын?
Тонэ сяна, музъем вылысь но номыре кулэ уг кариськы.
26Каньсыра мынам мугоры, сюлэмы но;
нош Инмар – со мынам сюлмылэн юнматскон интыез,
пумтэм вапумъёс ӵожелы сётэм ӟеч адӟонэ.
27Уго Тон бордысь палэнскисьёс куло-быро,
котькудзэ но бордысьтыд куштӥськисез Тон быдтӥськод.
28Нош мыным шумпотон – Инмарлэн матаз мыныны!
Инмаре Кузё-Инмаре, Тон вылэ оскиськыса улӥсько,
[Сӥон ныллэн капка дораз] Тынэсьтыд ваньзэ ужъёстэ
ивортыны мед быгатом шуыса.
Глава 72
