Bible
Choose Language
Old Testament Books
New Testament Books
ПСАЛТИРЬ
71-тӥ ПСАЛОМ
Соломон сярысь. [Давидлэн крезьгурез.]
1Эй, Инмаре! Законъёстэ эксэй кие сёт,
шонерлыктэ – эксэйлэн пиезлы,
2Тынэсьтыд калыктэ, Тынэсьтыд кураськисьёстэ
судын со шонер судить мед кароз.
3Гурезьёс адямиослы тупаса улон мед ваёзы, вырйылъёс – шонерлык.
4Калык пӧлысь кураськисьёслэн палазы мед пыроз,
начар муртлэсь нылпиоссэ мед утёз, ёртыса возисез зӥбыт мед кароз.
5Шундыен толэзь вань ӵоже
выжыысь выжые Тон азьын соос куалекъяса улозы.
6Со васькоз турнам возь вылэ зор кадь,
музъемез мускытатӥсь шапыкъёс выллем.
7Солэн нуналъёсаз шонер улӥсь сяськаяськоз,
толэзь кысытозь, тупаса улон пачылмыса улоз.
8Зарезь дурысен зарезь дурозь, шур дурысен музъем пумозь –
ваньмыз солэн киулаз луоз.
9Луоё кырын улӥсьёс солэн азяз йыбырттозы,
тушмонъёсыз пыдул сюез нюлозы.
10Фарсисысь но шормуӵъёсысь эксэйёс кузьымъёс сётозы,
Аравияысь но Саваысь эксэйёс саламъёс ваёзы.
11Солы вань эксэйёс йыбырттозы, вань калыкъёс солы ужалозы.
12Уго со викышъясь кураськисез,
юрттӥськисьтэк кылем ултӥям муртэз мозмытоз.
13Кураськисез, начар муртэз жалясь луоз,
ултӥямъёслэсь лулзэс утёз.
14Кескич ужлэсь, эриктэманлэсь соослэсь лулзэс утёз,
солэн азяз соослэн вирзы дуно луоз.
15Со кема мед улоз,
Аравиялэсь зарнизэ солы мед сётылозы,
дугдылытэк со понна мед вӧсяськозы,
нуналлы быдэ сое бакель мед карозы.
16Музъем вылын, гурезьёс йылын удалтэм нянь мед луоз;
Ливанысь нюлэс выллем солэн емышъёсыз мед веттаськозы,
музъем вылысь турын кадь городъёсын адямиос мед йылозы.
17Солэн нимыз пумтэм вапумъёс ӵоже [дано] луоз;
шунды кысытозь, солэн нимыз кылысь кылэ верамын мед луоз.
Со бордын [вань выжыос] бакель каремын мед луозы,
вань калыкъёс сое сӥлы карозы.
18Дано мед луоз Инмар Кузё-Инмар, Израильлэн Инмарез,
огназ паймымон ужъёс лэсьтӥсь!
19Солэн данэзлэн нимыз пумтэм вапумъёс ӵоже бакельлыко,
быдэс музъем выл Солэн данэныз пачылмоз.
Аминь, аминь.
20Иессей пи Давидлэн вӧсяськон кылъёсыз йылпумъяськизы.
Глава 71
