Choose Language
Old Testament Books
New Testament Books
1Кузё-Инмаре, Тон вылэ оскиськисько,
ноку но возьытэ усёно медам луы.
2Тон шонерлыко, уть монэ, мозмыты монэ,
пельдэ мон пала мыкырты, уть монэ.
3Утиськон изгурезь лу мыным,
котьку но мон отчы ватӥськыны мед быгатысал.
Тон монэ утьыны кыл сётӥд, Тон мынам юнматскон интые, изкаре.
4Эй, Инмаре! Сьӧлыклэсь кышкасьтэмлэн,
законлы пумит улӥсьлэн, ӝикатыса возисьлэн
киулысьтыз мозмыты монэ.
5Инмаре Кузё-Инмаре, Тон мынам осконэ,
пинал дырысеным мынам оскиськонэ.
6Вордскем дырысен Тон вылэ оскиськисько,
анае пушкысь Тон монэ поттӥд, Тонэ ушъямысь мон уг дугдылы.
7Тросэз понна мон паймымон маке кадь луи,
нош Тон мынам юн оскиськонэ.
8Нуналлы быдэ дугдылытэк кылы-ымы Тонэ мед ушъялоз,
[Тынэсьтыд данлыктэ кырӟаса вераны мед быгатом,]
вераны луонтэм чеберлыкед пырак ӵоже улэ.
9Пересьмон даурам кулэтэм эн кары монэ,
кынары бырыны ӧдъяку, эн кушты монэ.
10Тушмонъёсы мыным пумит верасько,
лулме кутыны возьмаськыса улӥсьёс куспазы кенешыса уло.
11Шуо: «Инмар сое куштӥз;
уйиське, кырме сое, солэн мозмытӥсез ӧвӧл».
12Эй, Инмаре! мынэсьтым эн палэнскы.
Эй, Инмаре! дырты мыным юрттӥськыны.
13Возьытэ мед усёзы, мед бырозы монэн тушмонъяськыса улӥсьёс.
Возьытэ вуттонэн, сӥтэм-сантэм луонэн мед шобырскозы
мыным уродлык утчасьёс.
14Мон котьку но [Тон вылэ] оскиськыса уло,
Тыныд ялан ушъян кылъёс вераса уло.
15Кылыным-ымыным шонерлыкед сярысь верало,
ӟеч каремдэ нуналлы быдэ иворто,
мон соослэсь лыдзэс ик уг тодӥськы уго.
16Кутско мон Инмарлэн Кузё-Инмарлэн
кужымез сярысь малпаськыны,
Тынэсьтыд шонерлыктэ тодам ваё –
Тынэсьтыд одӥг огнадлэсь шонерлыктэ тодам ваё.
17Эй, Инмаре! Тон монэ пинал дырысеным визьмаса возид,
туннэ нуналозь паймымон ужъёстэ ивортӥсько.
18Вуоно выжылы, вань лыктӥсьёсызлы
Тынад быдӟымлыкед, кужымед сярысь ивортытозям,
пересьмем берам но, пурысьтам берам но
монэ огнаме эн кельты, Инмаре.
19Эй, Инмаре, Тынад шонерлыкед ин йылозь;
быдӟымесь ужъёс Тон лэсьтӥд.
Вань-а Тыныд укшасез, Инмаре?
20Тон мон вылэ трос, лекесь шугадӟонъёс ысъялляд,
но нош ик лулъяськытылӥд монэ,
нош ик музъемлэн пыдэстэм гуысьтыз монэ поттылӥд.
21Тон монэ вылӥ карылӥд, буйгатылӥд монэ,
[музъемлэн пыдэсысьтыз поттылӥд монэ].
22Псалтирь шудыса, мон Тонэ, Тынэсьтыд зэмлыктэ
кырӟаса данъяло, Инмаре;
крезь шудыса, Тонэ кырӟаса ушъяло, Израильлэн Святоез!
23Тыныд кырӟакум, ымы шумпотэ, лулы но, уго Тон сое мозмытӥд.
24Нуналлы быдэ Тынэсьтыд шонерлыктэ ивортыло,
возьытэ вуттэмын, сантэмамын луозы
мыным уродзэ лэсьтыны турттӥсьёс.
Глава 70
