Choose Language
Old Testament Books
New Testament Books
1Хорлэн кивалтӥсезлы. Давидлэн крезьгурез. Кырӟан.
2Инмаре мед султоз но, Солэн тушмонъёсыз мед пазьгиськозы,
Сое адӟемзы потытэк улӥсьёс Солэн син азьысьтыз
бызьыса мед кошкозы!
3Кызьы ыше-быре ӵын, озьы ик соос мед ышозы-бырозы!
Кызьы тыл азьын сюсь сылме-ӵыжа,
озьы ик сьӧлыклэсь кышкасьтэмъёс Инмар азьын мед бырозы!
4Нош шонер улӥсьёс Инмар азьын мед шумпотозы,
мед шулдыръяськозы, мылкыдзэс мед ӝутозы.
5Инмармылы кырӟалэ, Солэсь нимзэ данъяса кырӟалэ,
инъёс вылтӥ Ветлӥсез сӥлы каре!
Солэн нимыз: Кузё-Инмар! Со азьын шумпотэлэ.
6Анай-атайтэк кылем нылпиослэн Атайзы,
палкышноослэн Дурбасьтӥсьсы –
Инмар – Аслаз святой улон интыяз.
7Огназы кылем муртъёсты Инмар корка пыртэ,
жильыетэ дурылэмъёсты эрике поттэ,
нош тэрытскисьтэм муртъёс ӟырдам луоё кыре кылё.
8Эй, Инмаре! Калыкед азьтӥ ветлыкуд, кыр дуннеетӥ мыныкуд,
9музъем зурказ, Инмар азьын пилемъёс зор кисьтӥзы,
ачиз Сӥнай но куалектӥз Инмар азьын,
Израильлэн Инмарезлэн азяз.
10Пачыл зор Тон кисьтӥд, Инмаре, люкетлы басьтэм музъемед вылэ.
Катьтэммыкуз-жадьылыкуз Тон сое юнматылӥд.
11Калыкед отын улӥз;
Аслад ӟечлыкеныд, Инмаре, куанерлы музъемез дасяд.
12Кузё-Инмар кыл сётоз: ивортӥсьёс пумтэм-йылтэм трос луозы.
13Ожмаськисьёслэн эксэйёссы пегӟо но пегӟо,
нош коркан пукись ожысь поттэм ваньбурез люке.
14Улон музъемады интыяськыса, дыдык анай кадь тӥ луиды –
солэн бурдъёсыз азвесен шобыртэмын,
нош тылыосыз – чылкыт зарниен.
15Куке Ваньмызлэсь Кужмо эксэйёсты быдэс музъем вылэ пазьгиз,
соку люкет музъем Селмон гурезьысь лымы кадь тӧдьы луиз.
16Инмар гурезь – Васан гурезь! Ӝужыт гурезь – Васан гурезь!
17Ӝужыт гурезьёс, малы тӥ кӧт пӧсен учкиськоды гурезь шоры,
кудӥз вылын Инмар мылкыд кариз улыны?
Кузё-Инмар отын пумтэм вапумъёс улоз.
18Инмарлэн ожмаськон уробоосыз пумтэм-йылтэм,
сюрсъёсын, сюрсъёсын.
Кузё-Инмар соос пӧлын, Сӥнайын, святой интыын.
19Тон вылӥе ӝутскид, пленэ сюремъёсты Аслыд басьтӥд,
адямиослы сётыны кузьымъёс басьтӥд,
пумитъяськисьёс пӧлысь потэмъёс но
Инмар Кузё-Инмар дорын улыны мед быгатозы шуыса.
20Вань нуналъёсы Кузё-Инмар дано мед луоз.
Инмар асьме вылэ секыт ныпъет понэ,
нош Со Ачиз ик уте но асьмемыз.
21Асьмелэн Инмармы – утиськон сётӥсь Инмар.
Кузё-Инмарлэн, Дунне Кутӥсьлэн, киулаз кулонлэн капкаез.
22Инмар Аслаз тушмонъёсызлэсь йырзэс сузмытоз,
законлы пумит улыса азгынмемлэсь йырсиё йырпыдэссэ.
23Кузё-Инмар шуиз: «Васанысь берен ваё,
зарезь пыдэслэн мурдалаосысьтыз потто,
24пыддэ вир пӧлы мед веттод,
пуныосыдлэн кылзэс тушмонъёслэн вир пӧлазы веттэм кадь ик».
25Эй, Инмаре, Тынэсьтыд мынэмдэ адӟизы, Инмарелэсь мынэмзэ,
Эксэелэсь вӧсяськон интыетӥ мынэмзэ.
26Азьпалтӥз кырӟасьёс мынӥзы, бертӥз – крезь шудӥсьёс,
шортӥз – тимпан шудӥсь нылъёс:
27«Тӥ, Израиль выжыысь потэм калык,
люкаськон интыосысен данъялэ Инмарез Кузё-Инмарез!»
28Отын покчиез Вениамин – соослэн азьветлӥсьсы,
отын Иуда выжыысь покчи эксэйёс – соослэн кивалтӥсь йыръёссы,
Завулон выжыысь покчи эксэйёс,
Неффалим выжыысь покчи эксэйёс.
29Инмар тыныд кужым сётыны дасяз.
Эй, Инмаре, ми понна лэсьтэмдэ юнматы.
30Иерусалимысь храмед понна эксэйёс Тыныд кузьымъёс ваёзы.
31Тростник будос пӧлысь пӧйшурез,
калыкъёслэн кунянъёссы пӧлысь ош уллёез,
азвесь арбериосын ушъяськисьёсты зӥбломыты;
ожмаськемзы потӥсь калыкъёсты пазя.
32Лыктозы Египетысь кузёйыръёс, Эфиопия Инмар пала кизэ мычоз.
33Музъем выл эксэйлыкъёс!
Инмарлы кырӟалэ, Кузё-Инмарез данъяса кырӟалэ.
34Вапумъёслэн кутсконысенызы
инъёслэн инъёстӥзы Ветлӥсез данъялэ.
Тани, Со Аслаз куараеныз кужмо куара сётэ.
35Инмарез данъялэ!
Солэн быдӟымлыкез – Израиль вылын,
Солэн быдӟым кужымез – пилемъёс йылын.
36Шурдыт Тон, Инмаре, вӧсяськон интыяд.
Израильлэн Инмарез – Со [Аслаз] калыкезлы кужым, юнлык сётэ.
Данлыко Инмар!
Глава 67
