Choose Language
Old Testament Books
New Testament Books
1Хорлэн кивалтӥсезлы. Шошанним шудонэн. Давидлэн крезьгурез.
2Эй, Инмаре, уть монэ, вуос лулы дорозь вуизы.
3Мур нюре мон нӧдӥ, султон инты но ӧвӧл;
вуэ пыдлояз пыри но, ӝог бызись ву монэ нуэ.
4Куараен бӧрдыса, мон катьтэмми,
ньылоны куасьмиз,
Инмарме возьмаса, синъёсы каньсыразы.
5Чик мугтэк, юнме шорысь монэ синазькыль карисьёс
йырысьтым йырсиелэсь но тросгес.
Юнме шорысь монэ уйылӥсь тушмонъёсы кужмоесь луизы,
мае мон ӧй талалля, сое сётыны кулэ.
6Эй, Инмаре, визьтэм улэмме тодӥськод,
сьӧлыкъёсы но Тынэсьтыд ватэмын ӧвӧл.
7Кузё-Инмаре, ин кужымъёслэн Инмарзы,
нокин но Тыныд оскись мурт монэн сэрен возьытэ медаз усьы вал.
Израильлэн Инмарез,
Тонэ утчасьёс монэн сэрен мыскыл каронэ медаз сюре вал.
8Тон понна сантэманзэс вылам нуисько,
возьдаськон ымнырме шобыртӥз.
9Агайёсы понна мон мурт адями луи,
аслам братъёсы понна палэнысь адями луи.
10Тынад коркаед понна тыршон мынам пушкам тылын ӝуа,
сантэмасьёслэн Тонэ сантэмамзы мон вылэ усьылэ.
11Визяса улӥсько, бӧрдӥсько,
нош со понна монэ серекъян-веранлы пӧрмыто.
12Дӥськут интые бышкись чурыт дӥсь дӥсясько,
нош соос понна мадён-веранлы пӧрмисько.
13Ӟезьы азьын пукисьёс мон сярысь супыльто,
вина юисьёс кырӟаса верало.
14Нош мон Тыныд вӧсясько, Кузё-Инмаре;
ӟеч эсэпед вань, эй, Инмаре, ӟеч мылкыдыныд кыл монэ,
зэмос утиськондэ вай мыным.
15Нӧд пӧлысь потты монэ, медам выйы вал;
монэ синазькыль карисьёслэсь, мур вуослэсь мозмыты вал.
16Медаз нуы монэ визыл ву, медаз ньылы бергась ву,
мон вылтӥ ымзэ медаз ворса ву.
17Эй, Кузё-Инмаре, кыл монэ, Тынад гажан-жалянэд ӟечлыко;
Аслад шырыт сямыныд мон шоры учкы.
18Аслэсьтыд ымнырдэ ляльчиедлэсь эн ваты;
мон куректӥсько, ӝоггес кыл монэ.
19Лулылэн матаз лыкты, мозмыты сое;
тушмонъёсы трос луэмын, уть монэ.
20Тон тодӥськод мынэсьтым серекъян-веранэ кылемме,
возьытэ вуонме, куре усёнме – вань тушмонъёсы Тынад азяд.
21Серекъян-веран сюлэмме писыръятӥз но, мон лябӟи;
жаляса палам пырисез возьмай, нош со ӧвӧл,
буйгатӥсьёсты уг шедьтӥськы.
22Сиён пӧлам сэп понӥзы, сюэ куасьмыку, монэ уксусэн сектазы.
23Сиён-юонэн пуктӥськем ӝӧк вылзы куректон-кайгулы медло,
тупаса юонзы – капканэ сюронлы.
24Пеймыт мед луоз соослэн син азьзы – медаз ни адӟе,
кусъёссэс но пырак ӵожелы лябӟыты.
25Соос вылэ Аслэсьтыд йыркурдэ кисьты,
вожпотонэдлэн гомась тылыз соосты мед шобыртоз.
26Улон интызы тырттэм мед кылёз, юрт пушказы улӥсез медаз луы.
27Уго Тон кинэ погыртӥд, со сьӧры эшшо уйисько на,
Тынад вӧсь каремедлэсь курадӟонъёссэ йылэто на.
28Законлы пумит улонэз законлы пумит улонзы борды ватса,
шонерлыко улонад соос медаз пыре.
29Улэпъёслэн книгаысьтызы соос мед ӵушиськозы,
шонер улӥсьёсын огазе медаз гожтӥське.
30Нош мон, куанер, курадӟисько;
эй, Инмаре, Тынад юрттэтэд монэ мед юнматоз.
31Инмарелэсь нимзэ кырӟаса мон данъяло,
тау карон кылъёс вераса, Сое вылӥ каро.
32Та Кузё-Инмарелы ярамонгес луоз ош сярысь,
сюръёсын, гижыосын ошпи сярысь.
33Востэм, зӥбыт улӥсьёс тае адӟозы но шумпотозы.
Инмарез утчасьёс, улӟоз тӥляд сюлэмды.
34Уго Кузё-Инмар кураськисьёсты кылзӥське,
пытсэтын пукисьёссэ но кулэтэм уг кары.
35Сое мед ушъялозы инбамъёс но, музъем но, зарезьёс но –
ваньмыз, мар соос пушкын выре-берга.
36Инмар Сӥонэз утёз, Иудалэсь городъёссэ пуктылоз,
отчы улыны интыяськозы, сое люкетлы басьтозы.
37Ляльчиосызлэн выжыоссы сое люкетлы басьтозы,
Солэсь нимзэ яратӥсьёс отчы улыны интыяськозы.
Глава 68
