Bible
Choose Language
Old Testament Books
New Testament Books
ПСАЛТИРЬ
65-тӥ ПСАЛОМ
Хорлэн кивалтӥсезлы. Кырӟан.
1Быдэс музъем выл, шумпотон куараен Инмарлы вазиськы.
2Солэсь нимзэ данъяса кырӟалэ, Сое сӥё-дано карыса ушъялэ.
3Инмарлы шуэлэ: «Макем шурдытэсь Тынад ужъёсыд!
Быдӟым кужымед луэмен, тушмонъёсыд Тыныд тэрытскыса уло.
4Быдэс музъем выл Тыныд мед йыбырттоз, мед кырӟалоз,
Тынэсьтыд нимдэ, [Вылысь Инмаре], данъяса мед кырӟалоз».
5Лыктэлэ но учкелэ Инмарлэн ужъёсыз шоры,
адямиос понна макем кышкытэсь Солэн ужъёсыз.
6Зарезез Со музъемлы пӧрмытӥз;
шур вамен вамышъяса потӥзы,
отысен ми Со понна шумпотӥмы.
7Аслаз быдӟым кужыменыз пумтэм вапумъёс Со кузёяське.
Солэн синъёсыз калыкъёс шоры учко,
бугыръяськон ӝуткасьёс вылӥе медаз ӝутскелэ.
8Калыкъёс, данъялэ Инмармес, Сое ушъяса вералэ.
9Со милесьтым лулмес утьыса возе,
пыдъёсмылы канжаськыны уг лэзьы.
10Тон милемыз чаклад-эскерид, Инмаре,
азвесез ӵыжатэм кадь Тон милемыз ӵыжатӥд.
11Тон милемыз сьӧлтэтэ пыртӥд, тыбырамы секыт ныпъет ошид.
12Калыкъёсты йыр выламы пуктылӥд.
Тылэ но, вуэ но ми пыримы – Тон милемыз ӟеч улонэ поттӥд.
13Тылын сутӥськись курбонъёс вайыса, Тынад коркад пыро,
сӥзиськемъёсме Тыныд сёто.
14Соос пумысен куректон-кайгырон дыръёсам
ымы усьтӥськиз, кылы вераз.
15Кӧё курбонъёсты ыжъёслэн кӧйынызы ӵындытыса, Тыныд ӝуто,
ошъёсты, кечъёсты курбон сёто.
16Ваньды, Инмарлэсь кышканэн улӥсьёс, лыктэлэ но кылзӥське,
лулы понна мар Со мыным лэсьтӥз, мон тӥледлы иворто.
17Ымыным мон Солы вазиськи, кылыным Сое сӥлы кари.
18Сюлмысьтым уродлыкез адӟемын луысал ке,
Кузё-Инмар монэ ӧй кылысал.
19Но Инмар кылӥз, мынэсьтым вӧсяськемме кабыл басьтӥз.
20Дано мед луоз Инмар,
Со мынэсьтым вӧсяськемме кулэтэм ӧз кары,
гажан-жалянзэ мон бордысь ӧз палэнты.
Глава 65
