Bible
Choose Language
Old Testament Books
New Testament Books
ПСАЛТИРЬ
64-тӥ ПСАЛОМ
1Хорлэн кивалтӥсезлы. Давидлэн крезьгурез. Кырӟан.
2Эй, Инмаре, Сӥон гурезьын Тонэ ушъян гуръёс возьмало,
Тыныд сӥзиськем [Иерусалимын] сётэмын луоз.
3Тон вӧсяськемез кылӥськод;
котькудӥз но лулмугор Тон доры лыктоз.
4Сьӧлыко ужъёс монэ вормо;
милесьтым йыружъёсмес Тон ӵошкатод.
5Тынад быръем, матад карем адями шудо –
со Тынад азбаръёсад улоз.
Коркаедлэн, святой храмедлэн, ӟечлыкеныз ми тыр луомы.
6Аслад шонерлыко, кышкатӥсь ужъёсыныд Тон милемлы ответ сёт.
Инмаре, милям Утисьмы, вань музъем пумъёслэн,
зарезьлэн кыдёказ сюремъёслэн оскиськонзы,
7Аслаз кужыменыз гурезьёсты пуктӥсь,
быдӟым кужымен куссэ думись.
8Зарезьёслэсь куашетэмзэс, тулкымъёссылэсь шаугетэмзэс,
калыкъёслэсь бугыръяськонзэс зӥбломытӥсь Тон!
9Музъемлэн вань палъёсаз улӥсьёс
паймымон тодметъёстэ адӟыса кышкатскозы.
Ӵук ӟардонэз но, шунды пуксёнэз но
данъяськонлы – шумпотонлы Тон лӧпкытод.
10Тон музъем вылэ вуылӥськод но солэсь сюзэ юзматӥськод,
жаль-жаль коттӥськод сое. Инмарлэн ӧрез вуэн пачылмемын.
Тон соослы сиён дасяськод, уго Тон ваньзэ лэсьтӥськод.
11Геры чуръёссэ вуэн люктаськод, лёг-гопъёссэ ӵошкатӥськод,
зор ву шапыкен небӟытӥськод, узьымъёссэ бакель кариськод.
12Арез ӟеч мылкыдыныд шобыртӥськод но тыр улон поттӥськод.
13Кыр бусыосыд узырлык ваё,
вырйылъёс кусъёссэс шумпотонэн думыло.
14Возь вылъёс пудо уллёосын дӥсясько,
нёжалъёс ю-нянен шобырско,
шумпотыса верасько, кырӟало.
Глава 64
