Bible
Choose Language
Old Testament Books
New Testament Books
ПСАЛТИРЬ
55-тӥ ПСАЛОМ
1Хорлэн кивалтӥсезлы. Палэнэ кошкыса чус улӥсь дыдык сярысь. Гефысен филистим муртъёс Давидэз киултэм бере солэн гожъямез.*а
2Эй, Инмаре, жаля монэ! Адями ньылыны турттэ монэ,
нуналлы быдэ вылам урдскыса, монэ ӝикатэ.
3Нуналлы быдэ тушмонъёсы, ньылыны турттыса, монэ утчало;
Вылысь Инмаре, мыным пумит султӥсьёс трос луизы ни!
4Кышкан лыктыку, Тон вылэ оскиськисько.
5Инмарлэсь кылзэ мон ушъяло;
Инмарлы оскиськисько, уг кышкаськы,
лулмугор мар мыным лэсьтоз?
6Нуналлы быдэ мынэсьтым кылъёсме сураса-пожаса пӧртмало;
соослэн мон сярысь вань малпанъёссы – уродлы.
7Мынэсьтым лулме кутыса быдтон понна люкасько,
ватӥсько но вамышъёсме чакласа уло.
8Шонертэм улэмзы понна
пунэм берыктонлэсь, оло, мозмытскыны быгатозы-а?
Вожпотон дыръяд калыкъёсты уськытылы, Инмаре.
9Мынам пегаса ветлэм нуналъёсы Тон дорын лыдъямын;
мынэсьтым синкылиосме Аслад тусьтыяд пон –
Тынад книгаяд гожтэмын ӧвӧл-а соос?
10Тыныд вазиськыкум, тушмонъёсы берлань чигнало;
соку мон тодӥсько, Инмар мон пала пыре шуыса.
11Инмарлы Кузё-Инмармылы, Кинлэсь кылзэ мон ушъясько,
12Солы мон оскиськисько, уг кышкаськы, – адями мыным мар кароз?
13Тыныд сӥзёнъёсы мон вылын, Инмаре,
тау карон кылъёсме Тыныд верало.
14Уго Тон мынэсьтым лулме кулонлэсь мозмытӥд,
[синъёсме – синвулэсь,] пыдъёсме канжаськонлэсь утид,
Инмар азьтӥ улэпъёслэн югыттӥзы мед ветлом шуыса.
*а 55:1 1 Экс. 21:10-11
Глава 55
