Bible
Choose Language
Old Testament Books
New Testament Books
ПСАЛТИРЬ
40-тӥ ПСАЛОМ
1Хорлэн кивалтӥсезлы. Давидлэн крезьгурез.
2Шудо, кин куанер сярысь, [кураськись сярысь] сюлмаське!
Шугадӟон нуналэ Кузё-Инмар сое мозмытоз.
3Кузё-Инмар сое утёз, возьмалоз солэсь улонзэ,
музъем вылын улыны шуд сётоз;
тушмонъёслэн киулазы Тон сое уд сёты.
4Висьыса кыллён валесаз Кузё-Инмар сое юнматоз.
Висьыса кыллён дыръяз Тон солэсь быдэс валессэ воштӥськод.
5Мон шуи: «Кузё-Инмаре! Жаля монэ, бурмыты мынэсьтым лулме;
Тон азьын мон сьӧлыкай».
6Тушмонъёсы мон сярысь урод кылъёс верало:
«Ку со кулоз, ку солэн нимыз быроз?»
7Монэ адӟыны лыктӥсь мурт ӧрекчаськон кылъёс вера;
солэн сюлмыз кескич малпанъёсын пачылме но
со отысь потыса вераське-валэкъяське.
8Ваньзы монэ синазькыль карисьёс куспазы сипырто,
мыным пумит лек уж малпало:
9«Со доры уродлык вуиз; выдӥз бере, азьланяз со уз султы ни».
10Монэн ӵош улӥсь адями но, кудӥз вылэ мон оскиськыса улӥ,
кудӥз мынэсьтым няньме сиыса улӥз, мон вылэ пыдтышсэ ӝутӥз.
11Нош Тон, Кузё-Инмаре, жаля монэ,
ӝут монэ, мон соослы пунэмзэ берыкто.
12Монэ вормыса, тушмонэ шумпотыса-шулдыръяськыса ӧз ке улы,
соку мон тодо – Тон мыным ӟеч мылкыдын улӥськод.
13Тон монэ дун-шектэм улэме понна утёд,
дауръёс ӵожелы Аслад азяд пуктод.
14Данлыко Кузё-Инмар, Израильлэн Инмарез,
вапумлэн кутсконысеныз вапумлэн пумозяз!
Аминь, аминь!
Глава 40
