Bible
Choose Language
Old Testament Books
New Testament Books
ПСАЛТИРЬ
39-тӥ ПСАЛОМ
1Хорлэн кивалтӥсезлы. Давидлэн крезьгурез.
2Кузё-Инмарлы мон туж оскиськыса улӥ,
Со мон пала мыкырскиз но
кылӥз мынэсьтым тэльмырыса куриськемме.
3Шимес гуысь, нӧд нюрысь монэ поттӥз но
мынэсьтым пыдъёсме изгурезь вылэ султытӥз,
пыдтышъёсме юнматӥз.
4Ымылы выль кырӟан сётӥз – Инмармес ушъясь кырӟан.
Тросэз адӟозы но кышкалозы, Кузё-Инмарлы оскиськозы.
5Шудо адями, кудӥз Кузё-Инмарлы оскиськыса улэ,
вылӥ мылкыдоос пала, ӧрекчаськонэ кожисьёс пала уг берытскы.
6Тон ми понна трос лэсьтӥд, Кузё-Инмаре, Инмаре мынам,
со паймымон ужъёсыдъя, малпанъёсыдъя кин Тыныд укшасез вань!
Мынам тодытэме, вераме потэ вал соос сярысь,
нош соос лыдъянлэн сьӧраз потэмын.
7Виро сётонэз, кузьым сётонэз Тон кулэ ӧд кары;
мынэсьтым пельёсме Тон усьтӥд;
тылын сутӥськись курбонэз, сьӧлык понна курбонэз Тон ӧд куры.
8Соку мон шуи: «Тани мон лыктӥ,
бинялтэм книгаын мон сярысь гожтэмез вань,
9Инмаре, мынам Тынэсьтыд эриктэ быдэсъяса улэме потэ,
Тынад законэд мынам сюлмам».
10Трос калык люкаськон пӧлысен
мон Тынэсьтыд шонерлыктэ ивортылӥ,
ымме ворсаса, мон ӧй улы: Тон, Кузё-Инмаре, тодӥськод.
11Тынэсьтыд шонерлыктэ сюлэмам ватыса, мон ӧй улы,
оскиськымон луонэд, утиськонэд сярысь вералляй,
трос калык люкаськон пӧлысен
гажан-жаляндэ, зэмлыктэ ӧй ватылы.
12Кузё-Инмаре, Аслэсьтыд шырыт сямдэ мынэсьтым эн ваты;
Тынад гажан-жалянэд, зэмлыкед ялан монэ мед утёзы.
13Уго лыдъяса быдтонтэм куректон-кайгуос монэ котыртӥзы;
законлы пумит ужъёсы мон доры вуизы,
адӟеме но уг луы: йырысьтым йырсиелэсь но трос соос,
сюлмы пушкам пумиз.
14Кузё-Инмаре! Ӟеч мылкыддэ возьматы, уть монэ,
Кузё-Инмаре! Дырты мыным юрттыны.
15Ваньзы мынам лулылы бырон утчасьёс мед керпотозы,
возьытэ мед усёзы!
Берлань мед чигналозы,
серем каремын мед луозы мыным урод малпасьёс!
16Туж мед куалектозы мыным «А-а, сюрид!» шуисьёс,
асьсэос возьытэ мед вуозы.
17Мед шумпотозы, шулдыръяськозы
Тон бордын ваньмыз Тонэ утчасьёс,
Тынэсьтыд утемдэ яратӥсьёс, ялан мед вералозы:
«Кузё-Инмар быдӟым!»
18Мон куанер, кураськись, нош Кузё-Инмар мон сярысь сюлмаське.
Тон – мынам Юрттӥсе, мынам Мозмытӥсе; эй, Инмаре! Эн ӝега.
Глава 39
