Bible
Choose Language
Old Testament Books
New Testament Books
ПСАЛТИРЬ
41-тӥ ПСАЛОМ
1Хорлэн кивалтӥсезлы. Дышетон. Корей пиослэн.
2Кызьы пужейлэн кошкись вуос дуре мынэмез потэ,
озьы ик мынам лулы Тон доры куриське, Инмаре!
3Инмар доры, улэп Инмар доры, лулы туж куриське:
лыктӥ но Инмар азе султыны быгатӥ ке.
4Синкылиосы мон понна уй но нунал нянь интыын вал,
нуналлы быдэ мыным шуылӥзы: «Кытын тынад Инмаред?»
5Та сярысь тодам вайыса, сюлмылэсь куректонзэ кисьтӥсько,
трос калык пӧлтӥ ветлылӥ,
празднике люкаськем калыкен ӵош
шумпотон, тау карон кылъёсын Инмар корка пырай.
6Малы куректӥськод тон, лулы, малы шугъяськиськод?
Инмарлы оскиськы, мон Сое эшшо данъяло,
аслэсьтым Утисьме, аслэсьтым Инмарме.
7Мынам пушкам лулы куректэ;
соин ик Тон сярысь Иордан музъемысен,
Ермонысен, Цоар гурезьысен тодам вайисько.
8Пыдэстэм дунне пыдэстэм дуннеез
ву усёнъёсыдлэн куараенызы ӧте;
Тынад вань вуосыд, вань тулкымъёсыд мон вылтӥ кошкизы.
9Аслэсьтыз гажан-жалянзэ Кузё-Инмар нуназе возьматоз,
уйин но мон Солы кырӟасько, улон сётӥсь Инмарелы вӧсяськисько.
10Инмарлы, Дурбасьтӥселы, шуо: «Малы Тон монэ вунэтӥд?
Тушмонъёсылэн ултӥямзылы чидатэк,
малы мон куректыса ветлӥсько?»
11Лыосме тӥям кадь, тушмонъёсы монэ сантэмало,
нуналлы быдэ соос мыным шуо: «Кытын тынад Инмаред?»
12Малы куректӥськод тон, лулы, малы шугъяськиськод? –
Инмарлы оскиськы, мон Сое эшшо данъяло,
аслэсьтым Утисьме, аслэсьтым Инмарме.
Глава 41
