Bible
Choose Language
Old Testament Books
New Testament Books
ПСАЛТИРЬ
38-тӥ ПСАЛОМ
1Хорлэн кивалтӥсезлы, Идифумлы. Давидлэн крезьгурез.
2Мон шуи: кылыным медам сьӧлыка шуыса,
улон сюресъёсы вылын сак уло;
мон азьын сьӧлыклэсь кышкасьтэм мурт вань дыръя
аслэсьтым ымме кортнаса уло.
3Мон кылтэм луи, чус улӥ, ӟечлык сярысь но ӧй ни поттылы;
куректон-кайгуэ эшшо но тросгес луиз.
4Пушкам сюлмы ӝуатскиз, малпанъёсам тыл кенжиз;
кылыным мон шуи:
5«Кузё-Инмаре, вера мыным кулон нуналме,
кӧня нуналэ мынам вань на, кыӵе со –
мон мед тодом, кыӵе вал мынам улэм дауре.
6Тани, Тон мыным улон нуналъёс сётӥд – вись кузьда,
Тон азьын мынам дауре номыр кадь но ӧвӧл.
Котькудӥзлэн адямилэн улонэз тӧл пельтэм кадь гинэ луэ.
7Пӧртмаськись вужер кадь адями ветлэ;
юнме со алекъяське, люка, но уг тоды, кинлы со ваньмыз кылёз.
8Кузё-Инмаре, кин вылэ мыным оскиськонэз?
Мынам оскиськонэ – Тон гинэ.
9Законлы пумит вань лэсьтэм ужъёсылэсь мозмыты монэ,
визьмыз сураськем муртлы сантэманы монэ эн сёты.
10Мон вераськисьтэм луи, ымме уг усьтӥськы – Тон озьы карид.
11Аслэсьтыд вӧсь каронъёстэ мон бордысь палэнты,
киыдлэн вӧсь каремезлы чидатэк, мон бырисько ни.
12Сьӧлыко ужъёсыз понна шарае поттыса, адямиез вӧсь карид ке,
кей бервылысь басма кадь кисьтӥськоз солэн чеберез.
Котькудӥзлэн адямилэн улонэз тӧл пельтэм кадь гинэ.
13Эй, Кузё-Инмаре, кыл мынэсьтым вӧсяськемме,
сюлворыса вазиськемме пеляд пон,
синкылиосме адӟыса, чус эн улы.
Ваньмыз мынам атайёсы сямен ик уго мон
Тон дорын пыдйылчи, лыктэм мурт.
14Та дуннеысь кошкемелэсь азьло, куке мон татын уг ни луы,
юнматскыны мед быгатом шуыса,
мон вылысь вожпотондэ палэнты».
Глава 38
