Bible
Choose Language
Old Testament Books
New Testament Books
ПСАЛТИРЬ
35-тӥ ПСАЛОМ
1Хорлэн кивалтӥсезлы. Кузё-Инмарлэн Давид ляльчиезлэн.
2Сьӧлыклэсь кышкасьтэмлэн сьӧлыкез сярысь мынам сюлмы шуэ:
«Солэн син азяз Инмарлэсь кышкан ӧвӧл».
3Сьӧлыклэсь кышкасьтэм ассэ ачиз лӥятэ,
законлы пумит улэмзэ утчамъяське,
сое синазькыль каре шуыса возьматон понна гинэ.
4Солэн ымысьтыз ӧрекчаськон, кескичъяськон кылъёс пото,
ӟеч уж лэсьтон понна визьмаськемез уг поты.
5Кӧлан интыяз законлы пумит уж малпа,
умойтэм сюрес вылэ султэ,
урод ужлэсь уг палэнскы.
6Кузё-Инмаре! Тынад гажан-жалянэд инбамозь,
зэмлыкед – пилемозь!
7Тынад шонерлыкед Инмар гурезьёс кадесь,
Тынад судъёсыд быдӟым пыдэстэм дунне кадесь!
Адямиосты но, пудоосты но утиськод Тон, Кузё-Инмаре!
8Макем дуно Тынад гажан-жалянэд, Инмаре!
Тынад бурдыдлэн вужераз адямиос каньылэн
кышкатэк улыны быгато.
9Коркаедлэн тыр луэменыз кӧтсы тыре,
ческытлыклэн шурысьтыз Тон соосты сектаськод.
10Тон дорын улонлэн ошмесэз вань уго,
Тынад югытысьтыд ми югытэз адӟиськомы.
11Тонэ тодӥсьёс дорын гажан-жаляндэ возь,
сюлмынызы шонер улӥсьёс дорын шонерлыктэ возь.
12Вылтӥяськисьлэн пыдыз мон вылэ медаз лёгиськы,
сьӧлыклэсь кышкасьтэмлэн киыз монэ медаз улля.
13Отын законлы пумит улӥсьёс усиллям,
сэрпалтэмын – султэмзы уг ни луы.
Глава 35
