Choose Language
Old Testament Books
New Testament Books
Давидлэн крезьгурез.
1Лек муртъёслы кӧт пӧсен эн улы,
законлы пумит уж лэсьтӥсьёслы эн вожъяськы.
2Ӝоген турын кадь соос куасьмозы,
вож турын-куар кадь соос шуялозы.
3Кузё-Инмарлы оскиськы, ӟеч уж лэсьты,
ас музъемад ул, оскиськымон лу.
4Кузё-Инмар дорын буйгатсконэд мед луоз,
Со тынад сюлмыдлэсь куронзэ быдэстоз.
5Аслэсьтыд сюрестэ Кузё-Инмар кие сёт, Солы оскиськы,
Со быдэстоз,
6югытэз кадь тынэсьтыд шонерлыктэ,
лымшорез кадь тынэсьтыд зэмлыктэ поттоз.
7Кузё-Инмарлы тэрытскы, Солы оскиськы.
Ас сюрес вылтӥз азинлыко мынӥсьлы, кескич адямилы
эн вожъяськы.
8Дугды вождэ поттэмысь, йыркуръяськондэ но кельты;
кӧт пӧсен улыса, урод уж лэсьтоно медад лу.
9Уго урод лэсьтӥсьёс быдтэмын луозы,
Кузё-Инмарлы оскиськыса улӥсьёс музъем басьтозы.
10Кема ик ӧвӧл ни – сьӧлыклэсь кышкасьтэм уз кыльы ни,
солэн интыез шоры учкод но – со ӧвӧл ни.
11Нош зӥбыт-востэм улӥсьёс музъем басьтозы,
каньыллыклэн трос луэменыз эзылозы.
12Сьӧлыклэсь кышкасьтэм шонер улӥсьлы пумит урод уж малпа,
со вылэ пиньёссэ йырйыса улэ.
13Нош Кузё-Инмар сое серекъя, адӟе уго, солэн нуналыз вуэ шуыса.
14Сьӧлыклэсь кышкасьтэмъёс палашсэс потто, пукыӵсэс золто
куанер улӥсез, кураськисез уськытон понна,
шонер сюрес вылтӥ мынӥсьёсты бышкалтон понна.
15Палашсы асьсэлэн ик сюлмазы мертчоз, пукыӵъёссы тӥяськозы.
16Шонер улӥсьлэн ӧжытэз но сьӧлыклэсь кышкасьтэм
трос муртъёслэн узырлыксылэсь ӟечгес.
17Уго сьӧлыклэсь кышкасьтэмъёслэн суйбыгытъёссы чигылозы,
нош шонер улӥсьёсты Кузё-Инмар юнматэ.
18Кузё-Инмар дун-шектэмъёслэсь нуналъёссэс тодэ,
соослэн басьтэм люкетсы пумтэм вапумъёс улоз.
19Секыт аръёсы соос возьытэ вуттэмын уз луэ,
сютэм аръёсы соос тыр улозы,
20нош сьӧлыклэсь кышкасьтэмъёс бырозы,
Кузё-Инмарлэн тушмонъёсыз ыжпилэн кӧйыз кадь бырозы,
ӵын пӧлын ышозы-бырозы.
21Сьӧлыклэсь кышкасьтэм пунэмен басьтэ но
пунэмзэ уг ни берыкты,
нош шонер улӥсь жалятэк сётэ.
22Уго Солэн бакель карем муртъёсыз музъем басьтозы,
нош каргам муртъёсыз быдтэмын луозы.
23Адямилэсь вамышъёссэ Кузё-Инмар юнматэ,
Солы ӟеч сюрессэ сётэ.
24Со канжаськиз ке но, уз усьы,
Кузё-Инмар уго сое китӥз кутыса возе.
25Мон егит вал, пересьми ни, нош ӧй адӟы,
шонер улӥсь куштэмын-кельтэмын мед луысал но
солэн выжыосыз нянь кураса мед ветлысалзы.
26Вань нуналъёсы со гажа-жаля, пунэмен сётэ,
солэн выжыосыз бакель каремын луозы.
27Урод ужлэсь палэнскы, ӟеч уж лэсьты – пумтэм вапумъёс улод.
28Уго Кузё-Инмар шонерлыкез яратэ,
Аслэсьтыз дун-чылкыт улӥсьёссэ уг кушты –
соос пумтэм вапумъёс улозы,
[нош законлы пумит улӥсьёс куштэмын луозы,]
сьӧлыклэсь кышкасьтэмъёслэн выжызы быдтэмын луоз.
29Шонер улӥсьёс музъем басьтозы но
со вылын пумтэм вапумъёс улозы.
30Шонер улӥсьлэн ымысьтыз визьмо кылъёс пото,
солэн кылыз зэмлыкез вера.
31Инмарезлэн законэз сюлэмаз улэ, солэн пыдтышъёсыз уз куалектэ.
32Сьӧлыклэсь кышкасьтэм шонер улӥсь сьӧрын чакласькыса улэ,
сое виыны утча.
33Нош Кузё-Инмар солэн кияз сое уз сёты,
судить карыкуз, янгыш карыны уз лэзьы.
34Кузё-Инмарлы оскиськы, Солэн сюрес вылаз возиськы:
музъем сётыны Со тонэ ӝутоз;
сьӧлыклэсь кышкасьтэмъёсты быдтэмез тон адӟод.
35Мон адӟи трос выжыё, трос ваё Ливанысь кедырпу кадь зӧкомем,
лек, сьӧлыклэсь кышкасьтэм муртэ;
36со ортчиз-кошкиз но, тани, со ӧвӧл ни,
мон сое утчай но, ӧй шедьты ни.
37Чакла дун-шектэмез, шонер улӥсь шоры учкы,
уго сыӵе адямилэн азьпалаз – каньыллык.
38Нош законлы пумит улӥсьёс ваньзы быдтэмын луозы,
сьӧлыклэсь кышкасьтэмъёслэн выжызы ышоз-быроз.
39Шонер улӥсьёслэн утиськонзы Кузё-Инмар бордысь потэ,
куректон-кайгырон дыръя Со соослэн утиськон интызы луэ.
40Кузё-Инмар юрттоз, мозмытоз соосты,
сьӧлыклэсь кышкасьтэмъёслэсь утёз соосты,
соос уго Солы оскиськыса уло.
Глава 36
