Choose Language
Old Testament Books
New Testament Books
Давидлэн крезьгурез.
1Кузё-Инмаре, мыным пумитъяськисьёсты судить кар,
монэн нюръяськисьёсты вормы.
2Ожмаськон тӥрлыктэ, щиттэ басьты но султы мыным юрттӥськыны.
3Потты палаштэ но мон сьӧры уйиськисьёслэсь сюрессэс ворса,
лулылы шу: «Мон – тынад утиськонэд»!
4Мед кепыралозы, возьытэ мед усёзы мынэсьтым лулме утчасьёс.
Берлань мед берытскозы, сӥтэм-сантэм луонэ мед кылёзы
мыным урод малпасьёс.
5Тӧл азьысь тузон кадь соос мед луозы,
Кузё-Инмарлэн Кылчинэз соосты мед уллялоз;
6соослэн сюрессы пеймыт, гылыт мед луоз,
Кузё-Инмарлэн Кылчинэз соосты уйыса мед мыноз.
7Чик мугтэк мон понна гу усьтыса дасяллям но
сьӧлтэтсэс ватыса пуктӥллям,
чик мугтэк мынам лулылы со гуэз гудӟиллям.
8Шӧдтэк шорысь со доры бырон мед лыктоз,
лушкемен мыным пуктэм сьӧлтэтэз сое ассэ мед кырмоз,
отчы бырыны мед усёз.
9Нош мынам лулы Кузё-Инмар бордын шулдыръяськоз,
Со дорысь лыктӥсь мозмытсконлы шумпотоз.
10Вань лыосы шуозы: «Кузё-Инмаре! Кин Тыныд укшасез вань,
кин кынартэмез кужмолэн киулысьтыз,
куанерез, кураськисез таласьлэн киулысьтыз мозмытэ?»
11Ӧрекчаськыса ӧвӧлтэмзэ верасьёс мыным пумит султӥзы:
мае мон уг тодӥськы, со пумысен кылме юало.
12Ӟеч лэсьтэме понна соос мыным пунэмзэ уродэн берыкто,
лулме огназзэ кельто.
13Соос висён дыръя мон бышкись чурыт дӥсян дӥсяса улӥ,
визяса лулме куасьтылӥ,
вӧсяськеме аслам пушкам выльысен берытскылӥз.
14Аслам эшелы кадь, аслам братэлы кадь лэсьтыны тыршылӥ;
куректыса-кайгырыса, йырме ошыса,
анайме бӧрдыса буре вайись мурт кадь мон ветлылӥ.
15Нош куке мон канжаськылӥ, тушмонъёсы шумпотылӥзы;
монэ тышкаськисьёс котырам люкаськылӥзы,
мар понна тышкаськизы – уг тодӥськы, но ӧз дугдылэ;
16кескич мынекъяса, мыным пумит пиньзэс йырйылӥзы.
17Кузё-Инмаре! Кема-а учкыса улод на?
Сьӧсь ужъёслэсь, сьӧсь пӧйшуръёслэсь мынэсьтым лулме,
огназ кылемез, уть.
18Быдӟым ӧтчамысен мон Тонэ данъяло,
пумтэм-йылтэм калык пӧлысен мон Тонэ ушъяло,
19мыным пумит юнме тушмонъяськыса улӥсьёс
мон пумысен шумпотыса-шулдыръяськыса медаз улэ,
чик янгышетэк монэ синазькыль карисьёс
синъёсынызы ог-огзылы медаз кырмышъялэ.
20Соос уго тупаса улон сярысь уг верасько,
музъем выллэн тупаса улӥсьёсызлы пумит кескич ужъёс малпало.
21Мон шоры ымзэс паськыт усьто но шуо:
«А-а, сюрид! Ас синмынымы адӟимы».
22Кузё-Инмаре, Тон адӟид, чус эн улы;
Кузё-Инмаре, мынэсьтым эн палэнскы.
23Инмаре Кузё-Инмаре, сайка,
судын кыстаськонам дурбасьтыны вырӟы!
24Кузё-Инмаре, Инмаре мынам, Ачид монэ шонер судить кар,
мон пумысен соос шумпотыса медаз улэ.
25Асьсэлэн сюлмазы медаз шуэлэ:
«Умой, [умой]! Милям лулмыя-мылкыдмыя!»
Медаз но шуэлэ: «Ми сое ньылӥмы».
26Мед возьдаськозы, мед керпотозы
ваньмыз мынам курадӟемелы шумпотӥсьёс.
Мон азьын вылтӥяськисьёс сӥтэм-сантэм мед луозы,
возьытэ мед усёзы.
27Мыным шонерлык сӥзисьёс мед шумпотозы,
шулдыръяськозы но дугдылытэк мед вералозы:
«Данлыко мед луоз Аслаз ляльчиезлы
каньыллык сӥзись Кузё-Инмар»!
28Мынам кылы нуналлы быдэ
Тынэсьтыд шонерлыктэ тодытыса улоз,
нунал лумбыт Тонэ ушъяса улоз.
Глава 34
