Bible
Choose Language
Old Testament Books
New Testament Books
ПСАЛТИРЬ
32-тӥ ПСАЛОМ
[Давидлэн крезьгурез.]
1Шонер улӥсьёс, Кузё-Инмар бордын шумпотыса улэ,
чылкыт сюлэмоослы ушъяны ярамон.
2Крезь шудыса, Кузё-Инмарез данъялэ,
дас сиё псалтирен шудыса, Солы кырӟалэ.
3Кырӟалэ Солы выль кырӟан; веськыт кырӟалэ, мылкыддэс сётыса,
4уго Кузё-Инмарлэн кылыз шонер,
Солэн вань ужъёсыз оскиськымонэсь.
5Со зэмлыкез, шонер судэз яратэ,
Кузё-Инмарлэн гажан-жалянэныз музъем тыр луэмын.
6Кузё-Инмарлэн кылыныз инъёс кылдытэмын,
Со ымыныз шокчиз но, вань ин кужымъёс кылдӥзы.
7Люкъёсты выллем зарезь вуосты Со люказ,
мертаны луонтэм мурдалаосты ву возён интыосы понӥз.
8Кузё-Инмарлэсь быдэс музъем кышка,
ваньзы дунне вылын улӥсьёс Со азьын куалекъяло,
9уго Со вераз но – луиз, Со косӥз но – пӧрмиз.
10Кузё-Инмар язычникъёслэсь кенешъёссэс куашкатъя,
калыкъёслэсь урод малпанъёссэс быдтэ,
[кивалтӥсьёслэсь кенешсэс быдтэ].
11Нош Кузё-Инмарлэн кенешез пумтэм вапумъёс улэ,
Солэн сюлмызлэн малпанъёсыз – выжыысь выжые.
12Шудо со калык, кинлэн Инмарез Кузё-Инмар луэ,
адямиос, кудъёссэ Со Аслыз люкетлы бырйиз.
13Инмысен Кузё-Инмар учке но вань адямиосты адӟе.
14Аслаз улон интыысеныз музъем вылын вань улӥсьёсты Со чакла.
15Соослэсь ваньзылэсь сюлэмзэс Со кылдытӥз,
соослэсь вань ужъёссэс тодэ-вала.
16Трос ожмаськись муртъёсын эксэй уз утиськы,
туж кужмо муртэз но туж быдӟым кужым уз утьы.
17Вал но утиськон понна оскиськымон ӧвӧл,
аслаз туж быдӟым кужыменыз вылаз пукисьсэ уз утьы.
18Тани, Кузё-Инмарлэн синмыз Солэсь кышкасьёс,
Солэн гажан-жалянэзлы оскиськисьёс вылын улэ,
19Со соослэсь лулзэс кулонлэсь уте,
сютэм аръёсы соосты улэп кельтэ.
20Милям лулмы Кузё-Инмар вылэ оскиське:
Со – милям юрттӥсьмы, Со милям щитмы.
21Со бордын милям сюлэммы шумпотэ,
Солэн дун-чылкыт нимызлы оскиськыса улӥськомы.
22Эй, Кузё-Инмаре, Тынад гажан-жалянэд ми вылын мед улоз,
кызьы ми Тыныд оскиськыса улӥськомы.
Глава 32
