Bible
Choose Language
Old Testament Books
New Testament Books
ПСАЛТИРЬ
26-тӥ ПСАЛОМ
Давидлэн крезьгурез. [Вӧйын зырӟемлэсь азьвыл.]
1Кузё-Инмар – югытэ мынам, утиськонэ мынам:
кинлэсь мыным кышкано?
Кузё-Инмар – улонэлэн юнматскон интыез:
кинлэсь мыным куалекъяно?
2Мынэсьтым лулмугорме сиыны малпаса,
мон вылэ лек муртъёс урдскизы ке, – мыным пумит мынӥсьёс,
тушмонъёсы, – соос асьсэос канжаськозы но усёзы.
3Мыным пумит полк ке но ӝутӥськиз, мынам сюлмы уз куалекты;
мыным пумит ож ке но ӝутӥськиз,
соку но Кузё-Инмарлы оскиськыса уло.
4Кузё-Инмарлэсь мон одӥгзэ гинэ кури,
сое гинэ утчасько –
вань улон нуналъёсы ӵоже мед быгатысал
Кузё-Инмарлэн корказ улыны,
Кузё-Инмарлэсь чеберлыксэ адӟыса улыны,
Солэн [святой] храмаз ветлыны.
5Курадӟонъёс вуон нуналэ Со монэ
вӧсяськон тылысаз пегӟытысал уго,
Аслаз улон интыяз монэ ватысал,
изгурезьлэн йылаз монэ ӝутысал.
6Монэ котыртэм тушмонъёсылэн йылазы йыры ӝутӥське;
вӧсяськон тылысаз кылын данъян курбон сётӥсько,
Кузё-Инмарез данъяса, кырӟаса улӥсько.
7Кузё-Инмаре, кыл мынэсьтым вазиськем куараме;
жаля монэ, кыл монэ.
8«Утчалэ Мынэсьтым ымнырме», –
мынам сюлмы Тыныд шуэ:
«Тынэсьтыд ымнырдэ мон утчало, Кузё-Инмаре».
9Аслэсьтыд ымнырдэ мынэсьтым эн ваты;
вожед потыку, ляльчидэ кулэтэм эн кары.
Тон мынам юрттӥськисе вал,
эн кушты монэ, эн кельты монэ, Инмаре, Утисе мынам!
10Атае но, анае но монэ кельтӥзы,
нош Кузё-Инмар монэ бордаз басьтоз.
11Кузё-Инмаре, Аслад сюресэдлы монэ дышеты,
тушмонъёсылэсь утиськон понна шонер сюрес вылтӥ монэ ну;
12тушмонъёсылэн киулазы монэ эн сёты:
ӧрекчаськыса ӧвӧлтэмзэ верасьёс мыным пумит султӥзы,
йыркурен пачылмыса шокало.
13Нош мон улэпъёслэн музъем вылысенызы
Кузё-Инмарлэсь ӟечлыксэ адӟо шуыса оскисько.
14Кузё-Инмарлы оскиськы, юнматскы,
сюлэмыд юн мед луоз, Кузё-Инмарлы оскиськы.
Глава 26
