Bible
Choose Language
Old Testament Books
New Testament Books
ПСАЛТИРЬ
24-тӥ ПСАЛОМ
Давидлэн крезьгурез.
1Тон доры, Кузё-Инмаре, лулме ӝутӥсько.
2Инмаре! Мон Тыныд оскиськисько,
[ноку но] возьытэ усёно медам луы вал,
мон пумысен тушмонъёсы шумпотыса улоно медаз луэ вал.
3Нокин но Тон вылэ оскиськыса улӥсь возьытэ уз усьы,
юнме шорысь законэз сӧрыса улӥсьёс возьытэ усёзы.
4Кузё-Инмаре, возьматы мыным Аслэсьтыд сюресъёстэ,
сюресъёсыдлы дышеты монэ.
5Аслад зэмлыкед пала ну, дышеты монэ,
уго Тон мынам утиськон Инмаре,
вань нуналъёс ӵоже Тыныд оскиськисько.
6Кузё-Инмаре, тодад вай Аслэсьтыд шырыт сямдэ,
гажась-жалясь луэмдэ, соос уго пумтэм вапумъёс ӵоже уло.
7Егит дыр сьӧлыкъёсме, янгышъёсме тодад эн вайы;
гажась-жалясь луэменыд, Кузё-Инмаре,
Аслад ӟеч сямыныд Тон монэ тодад вай!
8Ӟечлыко, шонерлыко Кузё-Инмаре,
Со сьӧлыкоослы сюрес возьматэ,
9зӥбыт улӥсьёсты шонерлыкез пала нуэ,
зӥбыт муртъёсты сюресэзлы дышетэ.
10Солэсь сӥзёнзэ, Солэсь курон-косонзэ утисьёс понна
Кузё-Инмарлэн вань сюресъёсыз
гажан-жалян но зэмлык луо.
11Аслад нимыд понна, Кузё-Инмаре,
мынэсьтым сьӧлыкме кушты, со туж быдӟым уго.
12Кин со адями, кудӥз Кузё-Инмарлэсь кышка?
Кузё-Инмар возьматоз солы кудзэ сюресэз бырйыны.
13Солэн лулыз ӟеч азьын улоз, выжыез музъем басьтоз.
14Кузё-Инмарлэн ватӥськыса улӥсь зэмлыкез
Солэсь кышкаса улӥсьёслы усьтӥське,
соослы Аслэсьтыз сӥзён-косонзэ Со ялэ.
15Мынам синъёсы котьку но Кузё-Инмар пала учко;
Со уго сьӧлтэтысь поттэ мынэсьтым пыдъёсме.
16Учкы мон шоры, жаля монэ, мон одӥгнам, ултӥямын.
17Сюлмылэн куректон-кайгуосыз трос луизы,
секыт адӟонъёсы пӧлысь потты монэ.
18Курадӟыса, катьтэммыса улэме шоры учкы,
мынэсьтым вань сьӧлыкъёсме кушты.
19Учкы мынам тушмонъёсы шоры, макем трос соос луизы,
макем лек синазькыль карыса, соос монэ адӟонтэм каро.
20Лулме уть, мозмыты монэ,
Тыныд оскиськыса улэме понна возьытэ медам усьы вал.
21Дун-шектэм, шонер улон монэ мед утёз,
Тыныд мон оскиськисько.
22Эй, Инмаре, Израилез вань шугадӟонъёсызлэсь мозмыты.
Глава 24
