Bible
Choose Language
Old Testament Books
New Testament Books
ПСАЛТИРЬ
18-тӥ ПСАЛОМ
1Хорлэн кивалтӥсезлы. Давидлэн крезьгурез.
2Инъёс Инмарлэсь данлыксэ тодыто,
Солэн киызлэн ужъёсыз сярысь инбам ивортэ.
3Нунал соосты нуналлы вера, уй – уйлы тодытэ.
4Ӧвӧл сыӵе кыл, ӧвӧл сыӵе калык,
кытын соослэн куаразы медаз кылӥськы вал.
5Быдэс музъем вылэ соослэн куаразы вӧлме,
дуннелэн пумозяз соослэн кылъёссы вуо.
Отчы Со шундылы улон инты пуктӥз.
6Эмеспи кадь шунды сюан коркасьтыз потэ,
батыр кадь шумпотэ аслэсьтыз удыссэ бызьыса ортчыны:
7Инлэн пумысьтыз солэн ӝужанэз,
инлэн мукет пал пумаз солэн пуксёнэз,
солэн шунытэзлэсь номыр но ватэмын ӧвӧл.
8Кузё-Инмарлэн законэз дун-шектэм, лулэз юнматэ.
Кузё-Инмарлэн усьтон-косонэз шонер, огшоры калыкез визьма.
9Кузё-Инмарлэн косонъёсыз шонересь, сюлэмез шулдырто,
Кузё-Инмарлэн курон-косонэз дун-чылкыт, синъёсты югдытэ.
10Кузё-Инмарлэсь кышкан чылкыт, пумтэм дауръёс улэ.
Кузё-Инмарлэн законъёсыз – зэмлык, ваньмыз шонересь.
11Соос зарнилэсь но, чылкытатэм трос зарнилэсь но дуноесьгес,
чечылэсь но, карас чечы шапыклэсь но ческытэсьгес.
12Тынад ляльчиед соос бордын утиськыса улэ;
соосты быдэсъям понна быдӟым луоз медэз-кузьымез.
13Кин аслэсьтыз янгышъёссэ вала?
Ватӥськем сьӧлыкъёсылэсь чылкытаты монэ.
14Тодыса лэсьтӥськись сьӧлыко ужъёслэсь ляльчидэ уть,
монэ вормыса медаз улэ.
Соку мон туж трос сьӧлыкъёслэсь дун-шектэм, чылкыт луо.
15Кузё-Инмаре, юнматскон интые, Мозмытӥсе!
Ымысьтым потэм кылъёсы, сюлмылэн малпанэз
Тон азьын ярамонэсь мед луысалзы.
Глава 18
