Choose Language
Old Testament Books
New Testament Books
1Хорлэн кивалтӥсезлы. Кузё-Инмарлэн ляльчиезлэн Давидлэн кырӟанэз. Кузё-Инмар сое вань тушмонъёсызлэн, Сауллэн киулысьтызы мозмытэм бере та кырӟанлэсь кылъёссэ Давид Кузё-Инмар азьын лыдӟыса шуиз:
2Кузё-Инмаре, Тонэ яратӥсько!
Тон – мынам кужыме.
3Кузё-Инмар – юнматскон интые, изкаре, Мозмытӥсе.
Инмар – мынам Юрттӥсе, Солы оскиськисько;
Со мынам щитэ, утиськон интые, Дурбасьтӥсе.
4Ушъяса Кузё-Инмарлы вазисько но тушмонъёслэсь утисько.
5Кулон сьӧлтэтъёс монэ ӟыгыртӥзы,
законлы пумит улонлэн тулкымъёсыз монэ кышкатӥзы.
6Адлэн жильыосыз ӝикатӥзы, кулонлэн сьӧлтэтъёсыз матам вуизы.
7Ӝикаса улыкум, Кузё-Инмарез вӧсяськыса ӧти,
Инмарелы быдӟым куараен вазиськи.
Аслаз [святой] храмысеныз Со куараме кылӥз,
сюлвореме пеляз вуиз.
8Куалекъяз, зурказ музъем, куалектӥзы, вырӟизы гурезь выжыос,
[Инмар] вожзэ поттӥз уго.
9Со вожзэ поттӥз но, ӵын ӝутӥськиз,
ымысьтыз ньылӥсь тыл потӥз,
ӝуась эгыръёс бордысьтыз усьылӥзы.
10Со инбамез някыртӥз но васькиз, пыд улаз – пеймытлык.
11Херувимъёс вылэ пуксьыса лобӟиз,
тӧллэн бурдъёсыз вылын кошкиз.
12Пеймытлыкез Аслыз шобрет кариз,
вуослэсь пеймытлыксэс, пилемъёсты Аслыз шобрет кариз.
13Ворекъяса улыку, Солэн азьтӥз
йӧзорен, ӝуась эгыръёсын пилемъёс бызизы.
14Инмысен Кузё-Инмар гудыртӥз,
Вылысь Инмар куаразэ поттӥз,
йӧзорез, ӝуась эгыръёсты сётӥз.
15Пукыӵ ньӧлъёссэ лэзьыса, тушмонъёсты пазьгиз,
чилекъясь тылъёсты поттыса, соосты уськытъяз.
16Кузё-Инмаре, лек куарадэ поттыса, вожпотонэн шокчид но,
зарезьлэн пасьёсыз усьтӥськизы,
дуннелэн пыдэсъёсыз возьматскизы.
17Вылӥысен кизэ мычыса, Со монэ басьтӥз,
трос вуос пӧлысь монэ поттӥз.
18Кужмо тушмонэлэсь, мынэсьтым кужмоесь,
монэ адӟонтэм карисьёслэсь Со монэ мозмытӥз.
19Курадӟон нуналам соос мыным пумит султӥзы,
нош Кузё-Инмар мынам юнматскон интые вал.
20Со монэ эркын интые поттӥз, мозмытӥз,
Со монэ яратэ уго.
21Шонер улэме понна Кузё-Инмар мыным ӟечен берыктӥз,
чылкыт улэме понна Со мыным медзэ-кузьымзэ сётӥз.
22Кузё-Инмарлэн сюресъёсыз вылын мон сылӥ уго,
Инмаре азьын сьӧлыклэсь кышкатэк ӧй улы.
23Солэн вань курон-косонъёсыз мон азьын,
законъёссэ но быдэсъятэк мон ӧй улы.
24Со азьын мон дун-шектэм вал,
медам сьӧлыка вал шуыса, чакласькыса улӥ.
25Шонер улэме, чылкыт улэме понна
Кузё-Инмар мыным ӟечен берыктӥз.
26Жалясьёсты Тон жаляськод,
чылкыт сюлэмолы чылкытэзъя пунэмзэ берыктӥськод.
27Дун-шектэмлы дун-шектэм улэмезъя,
нош кескичлы кескич улэмезъя пунэмзэ берыктӥськод.
28Зӥбыт-востэм муртъёсты Тон утиськод,
нош вылӥ мылкыдоослэсь синъёссэс лапкатӥськод.
29Тон, Кузё-Инмаре, лампадаме ӝуатӥськод;
Инмаре пеймытын улонме югдытэ.
30Тонэн валче мон войскоез пазьгисько,
Инмаре юрттэмен, из борддорез тэтчыса потӥсько.
31Инмар! – Дун-Шектэм Солэн сюресэз,
Кузё-Инмарлэн кылыз чылкыт,
ваньмызлы, Солы оскиськисьёслы, Со щит луэ.
32Кузё-Инмар сяна, кин на Инмар,
Инмармы сяна, кин асьмелэн дурбасьтӥсьмы вань на?
33Инмар, мыным кужым сётыса, кусме думе,
мыным шонер сюрес дася.
34Пыдъёсме пужейлэн кадь шаплыесь каре,
ӝужыт интыосам Со монэ султытэ;
35ожмаськыны киосме дышетэ,
суйбыгытэ ыргон пукыӵез золтэ.
36Тон мыным утиськон щиттэ кузьмад,
бур киыд монэ кутыса возе,
гажан-жалянэд монэ вылӥе ӝутэ.
37Пыд улысьтым вамышме кузятӥськод но,
пыдъёсы уг ни куалекъяло.
38Мон тушмонъёсме уйыса мынӥсько, сутӥсько но,
соосты быдтытэк, уг ни берытскиськы.
39Шуккисько но, соос уг ни быгато султыны – пыд улам усьыло.
40Ожмаськон понна уго Тон,
мыным кужым сётыса, кусме думид,
мыным пумит султӥсьёсты пыд улам уськытъяд.
41Тушмонъёсме мышкынызы мон пала берыктӥд но,
адӟемпотостэм карисьёсме мон быдтӥсько.
42Юрттэт курыса, соос кесясько, нош утисьсы ӧвӧл,
Кузё-Инмарлы вазисько, нош Со уг кылзӥськы соослэсь.
43Тӧл азьысь тузонэз кадь мон соосты пазьго,
ульчаысь дэриез кадь соосты лёгало.
44Калыклэн бугыръяськонэзлэсь Тон монэ мозмытӥд,
мурт выжы калыкъёслы Тон монэ кузё карыса пуктӥд,
тодмотэм калык мыным ужаса улэ.
45Мон сярысь кыло гинэ, соку ик мыным тэрытӥсько;
мурт выжыос мон азьын тэрытскыны выро.
46Мурт выжыос юнматэм каръёсазы кӧдэктыса,
дыр-р куалекъяса уло.
47Кузё-Инмаре улэп, данлыко мынам Дурбасьтӥсе!
Мынам утиськонэлэн Инмарез данъямын мед луоз!
48Со мон понна пунэмзэ берыктэ,
калыкъёсты мынам киулам сётэ,
49монэ тушмонъёсылэсь мозмытэ!
Мыным пумит урдскемъёслэн йылазы Тон монэ ӝутӥд,
сьӧсь муртлэсь монэ мозмытӥд.
50Кузё-Инмаре, со понна мон Тонэ мурт выжыос пӧлын данъяло,
Тынэсьтыд нимдэ ушъяса кырӟало.
51Тон эксэйлы быдӟым утиськон вайиськод,
вӧйын зырӟыса эксэе пуктэмзэ,
Давидэз но солэсь выжы-кумыоссэ,
пумтэм вапумъёс ӵоже гажаса-жаляса возиськод.
Глава 17
