Bible
Choose Language
Old Testament Books
New Testament Books
ПСАЛТИРЬ
142-тӥ ПСАЛОМ
Давидлэн [Авессалом пиез сьӧраз уйиськыса ветлыку] гожтэм крезьгурез.
1Кузё-Инмаре! Кыл вӧсяськемме,
Тон зэмлыко, санэ пон вӧсяськемме,
Тон дорын шонерлык, кыл монэ.
2Монэн, ляльчиеныд, судэ эн пыры, –
вань улӥсьёс пӧлысь одӥгез но Тон азьын шонере потыны уз быгаты.
3Лулы сьӧры тушмон улляське, улонме со сюе лёгаз,
вашкала дыре кулэмъёсты кадь пеймыт азе кужмысь монэ пытсаз.
4Пушкам лулы каньсыраз, сюлмы куалектӥз.
5Вашкала нуналъёсты тодам вайисько,
вань ужъёсыд сярысь малпаськисько,
киыдлэсь ужъёссэ син азям пуктӥсько.
6Тон доры киосме мычисько,
вулы ӟудыса пашмем музъем кадь лулы Тон доры куриське.
7Ӝоггес кыл монэ, Кузё-Инмаре: лулы потыны турттэ;
шайгуэ пырисьёслы мон медам укша шуыса,
ымнырдэ мынэсьтым эн ваты.
8Вазь ик мыным Аслэсьтыд гажан-жаляндэ возьматы,
мон Тыныд оскиськыса улӥсько.
[Кузё-Инмаре,] возьматы, кудтӥз сюрестӥ мыным мыноно,
мон Тон доры лулме ӝутӥсько.
9Кузё-Инмаре, тушмонъёсылэсь монэ уть,
Тон дорын мынам утиськонэ.
10Эриктэ быдэсъяса улыны монэ дышеты, Тон – мынам Инмаре;
ӟечлыко Духед шонер улонлэн музъемаз монэ мед нуоз.
11Кузё-Инмаре, Аслад нимыд понна монэ лулъяськыты;
Тон шонерлыко, лулме ёрмыса улонысь потты.
12Гажась-жалясь Инмаре, тушмонъёсме быдты,
лулме ултӥясьёсты пазьгы – мон Тынад ляльчиед.
Глава 142
