Bible
Choose Language
Old Testament Books
New Testament Books
ПСАЛТИРЬ
139-тӥ ПСАЛОМ
1Хорлэн кивалтӥсезлы. Давидлэн крезьгурез.
2Кузё-Инмаре, лек муртлэсь мозмыты монэ,
ёртыса возисьлэсь уть монэ.
3Сюлмазы соос уродзэ малпало,
нуналлы быдэ жугиськон-керетонэ люкасько.
4Кый музэн асьсэлэсь кылзэс шеро, сьӧд кыйлэн ядэз кыл улазы.
5Кузё-Инмаре, сьӧлыклэсь кышкасьтэмъёслэсь уть монэ,
ёртыса возисьёслэсь возьма монэ,
пыдессинъёсме куалекъятыны соос малпазы.
6Вылтӥяськисьёс мыным капкан, нальык ватыса дасязы,
сюрес вамен казь кыскизы, уськытон понна сьӧлтэт пуктӥзы.
7Кузё-Инмарлы мон шуи: «Тон – мынам Инмаре;
Кузё-Инмаре, вӧсяськем куараме кыл!»
8Кузё-Инмаре, Кузё-Инмаре, утиськон кужыме!
Ожмаськон нуналэ йырме шобыртӥд.
9Кузё-Инмаре, сьӧлыклэсь кышкасьтэм медаз вылтӥяськы шуыса,
мылкыд каронзэ быдэстыны эн лэзьы,
урод малпанэзлы быдэсмыны азинлык эн сёты.
10Монэ котыртӥсьёслэн ымысьтызы потэм уродлык
асьсэлэсь йырзэс мед шобыртоз.
11Ӝуась эгыръёс соос вылэ мед усёзы,
султэмзы луонтэм вылысь соос тыл пӧлы,
пыдэстэм гуэ куштэмын мед луозы.
12Лек кыло мурт музъем вылын уз возиськы,
ёртыса возисез лекез быронэ нуоз.
13Тодӥсько, Кузё-Инмар ултӥям муртъёслы дурбасьтоз,
куанеръёслы шонер улон сётоз.
14Со понна шонер улӥсьёс Тынэсьтыд нимдэ данъяса улозы,
дун-шектэмъёс Тон азьын улозы.
Глава 139
