Bible
Choose Language
Old Testament Books
New Testament Books
ПСАЛТИРЬ
138-тӥ ПСАЛОМ
Хорлэн кивалтӥсезлы. Давидлэн крезьгурез.
1Кузё-Инмаре! Тон монэ чаклад-эскерид но тодӥд.
2Тон тодӥд, ку мон пуксисько, ку султӥсько;
малпанъёсме но кемаласен тодӥськод.
3Мынӥсько-а мон, кыллисько-а, Тон монэ чакласькод,
вань сюресъёсы но Тыныд азьвыл ик тодмо.
4Кылме вераны ымме ӧй на усьты,
нош Тон, Кузё-Инмаре, сое быдэсак тодӥськод ини.
5Азьтӥм но, бертӥм но Тон монэ ӟыгыртӥськод,
вылам кидэ поныса, монэ утиськод.
6[Тынад] тодонэд мон понна паймымон – вылӥ!
Сое валаны мон уг быгатӥськы!
7Тынад Духедлэсь кытчы мыном,
Тынад син азьысьтыд кытчы пегӟыны быгато?
8Инме-а тубисько, – Тон отын;
адлэн пыдэсаз-а васькисько, – отын но Тон.
9Ӵук ӟардонлэсь бурдъёссэ басьтыса, зарезьлэн пумаз интыяськи ке,
10отысен но Тынад киыд монэ нуоз, бур киыд монэ кутыса возёз.
11Мон шуисько: «Оло нош монэ пеймыт шобыртоз?»
Мон понна уй но югытлы пӧрме.
12Монэ пеймыт но Тынэсьтыд уг ваты;
уй но нунал кадь ик югыт, пеймытлык но – югытлык кадь ик.
13Мынэсьтым пушъёсме Тон кылдытӥд, анаелэн пушказ монэ куид.
14Тонэ данъясько: мон уго паймымон кылдытэмын.
Паймымонэсь Тынад ужъёсыд, лулы сое ӟеч тодэ.
15Пыдлось пушкын лушкемен кылдытӥськыкум,
лыосы Тынэсьтыд ватӥськемын ӧй вал.
16Тынад синъёсыд монэ кылдэмелэсь азьло ик адӟизы ни;
улоно нуналъёсы пӧлысь одӥгез но ӧй на вал,
нош Тынад книгаяд мыным дасям вань нуналъёсы гожтэмын ни вал.
17Мон понна макем дуноесь Тынад малпанъёсыд, Инмаре,
туж трос соос!
18Соосты лыдъяны кутски ке, соос луолэсь но трос;
сайкам берам но ялан Тонэн улӥсько.
19Эй, Инмаре, сьӧлыклэсь кышкасьтэмез погыртысалыд ке!
Палэнске мон бордысь, вир юисьёс!
20Тыныд пумит соос урод кылъёс верало;
Тыныд пумит тушмонъёсыд аляк уж малпало.
21Кузё-Инмаре,
Тонэ адӟонтэм карисьёсыз синазькыль медам кары-а?
Тыныд пумит султӥсьёсты кулэтэм медам кары-а?
22Кызьы адӟонтэм карыны луэ, озьы мон соосты адӟонтэм карисько;
соос мыным тушмонъёс луизы.
23Чакла-эскеры монэ, Инмаре, тод, мар мынам сюлмам.
Чакла-эскеры монэ, тод мынэсьтым малпанъёсме.
24Учкы, кышкыт сюрес вылын ӧвӧл-а мон, –
бырисьтэм улон сюрес вылтӥ ну монэ.
Глава 138
