Bible
Choose Language
Old Testament Books
New Testament Books
ПСАЛТИРЬ
134-тӥ ПСАЛОМ
Аллилуия.
1Кузё-Инмарлэсь нимзэ ушъялэ,
ушъялэ, Кузё-Инмарлэн ляльчиосыз,
2Кузё-Инмарлэн корказ сылӥсьёс,
Инмармылэн юртэзлэн азбаръёсаз сылӥсьёс!
3Кузё-Инмарез ушъялэ, Кузё-Инмар ӟеч уго!
Солэн нимызлы кырӟалэ, со шумпотон вае уго,
4Кузё-Инмар Аслыз Иаковез бырйиз, Израиль Солы узырлык луиз.
5Мон тодӥ, Кузё-Инмар быдӟым,
Кузё-Инмармы вань инмаръёслэсь*а вылӥын шуыса.
6Кузё-Инмар лэсьтэ ваньзэ, мае кулэен лыдъя – инъёсын но,
музъем вылын но, зарезьёсын но, вань пыдэстэм дуннеосын но.
7Музъем пумысь пилемъёсты ӝутэ, зорыку чилекъятэ,
шыкысъёсысьтыз тӧлэз поттэ.
8Египетлэсь нырысь вордӥськемъёссэ –
адямиосты но, пудоосты но – ваньзэ Со погыртӥз.
9Тынад пӧлад, Египет, фараон вылэ, солэн вань ляльчиосыз вылэ,
паймымон тодметъёс, паймымон ужъёс Со ыстӥз.
10Трос лыдо калыкъёсты погыртӥз, кужмоесь эксэйёсты быдтӥз,
11Аморрейлэсь Сӥгон эксэйзэ, Васанлэсь Ог эксэйзэ,
вань Ханаан эксэйлыкъёсты но Со быдтӥз.
12Соослэсь музъемзэс Израильлы, Аслаз калыкезлы, люкетлы сётӥз.
13Кузё-Инмаре! Тынад нимыд пумтэм вапумъёс улоз;
Кузё-Инмаре! Тонэ тодэ ваён выжыысь выжые уз быры.
14Кузё-Инмар Ас калыксэ шонерлыко судить каре,
Аслэсьтыз ляльчиоссэ Со гажа-жаля.
15Язычникъёслэн сульдэръёссы азвесьлэсь но зарнилэсь –
адями киын лэсьтэм уж.
16Вань соослэн ымзы, но уг верасько;
вань соослэн синъёссы, но соос уг адӟо.
17Вань соослэн пельёссы, но соос уг кыло;
ымынызы уг но шокало.
18Соосты лэсьтӥсьёс но, ваньмыз соослы оскисьёс но
соос выллемесь ик луозы.
19Израильлэн юртэз! Кузё-Инмарез данъялэ.
Ааронлэн юртэз! Кузё-Инмарез данъялэ.
20Левийлэн юртэз! Кузё-Инмарез данъялэ.
Кузё-Инмарлэсь кышканэн улӥсьёс! Кузё-Инмарез данъялэ.
21Дано мед луоз Сӥонын, Иерусалимын, улӥсь Кузё-Инмар!
Аллилуия!
*а 134:5 учкы: Пс. 49:1
Глава 134
