Bible
Choose Language
Old Testament Books
New Testament Books
ПСАЛТИРЬ
11-тӥ ПСАЛОМ
1Хорлэн кивалтӥсезлы. Тямыс сиё шудонэн. Давидлэн крезьгурез.
2Кузё-Инмаре, уть [монэ]! Шонер улӥсь ӧвӧл ни уго,
адямиос пӧлын оскиськымонэз ӧз ни кыльы.
3Ваньзы ог-огенызы ӧрекчаськыса верасько;
кылынызы чеберъяськисесь, сюлэмъёссы кескичесь.
4Кузё-Инмар быдтоз вань чеберъяськись ымъёсты,
вылтӥяськись кылъёсын вераськисьёсты.
5Соос тазьы шуо: «Кылынымы вормомы,
ыммы пытсамын ӧвӧл – кин милемлы кузё?»
6«Кураськисьёслэн курадӟемзы,
куанеръёслэн лулӟиськылэмзы понна
али султо но утиськон сёто солы,
кинэ кутыны туртто», – шуэ Кузё-Инмар.
7Кузё-Инмарлэн кылъёсыз – чылкыт кылъёс,
гурын, тыл пӧлын сюйлэсь сузям, сизьым пол ӵыжатэм азвесь.
8Тон, Кузё-Инмаре, милемыз утёд,
даурысь дауръёсы та выжылэсь чаклалод.
9Адямиос пӧлысь укылтэмъёс ӝутӥсько ке,
котькытӥ но сьӧлыклэсь кышкасьтэмъёс ветло.
Глава 11
