Choose Language
Old Testament Books
New Testament Books
[Дуннеез кылдытон сярысь Давидлэн крезьгурез.]
1Эй, лулы, Кузё-Инмарез данъя! Кузё-Инмаре, Инмаре мынам!
Тон паймымон быдӟым чеберлыкен,
быдӟым данлыкен Тон дӥсяськемын.
2Риза дӥсянэн кадь Тон югытэн дӥсяськиськод,
ынэз кадь инъёсты вӧлдӥськод;
3вуослэн вылӥязы юртъёстэ-четлыкъёстэ пуктылӥськод,
пилемъёсты Аслыд уробо кариськод,
тӧллэн бурдъёсыз вылын ворттылӥськод.
4Тӧлъёсты Аслыд ивортӥсьёс кариськод,
гомаса ӝуась тылэз Аслыд ужасьёс кариськод.
5Музъемез Тон юн инъетъёс вылэ пуктӥд,
вапумъёсысь вапумъёсы со уг вырӟылы.
6Пыдэстэм вуэн, дӥсянэн кадь, Тон сое шобыртӥд;
гурезьёс йылын вуос пуко.
7Тон косӥськод но, соос бызьыса кошко,
гудыртэм куараедлэсь пегӟо соос.
8Гурезьёс тубо, нёжалъёс лэзисько соослы дасям интыозяд.
9Тон гож лэсьтӥд, со вамен соос уз выже,
музъемез шобыртыны уз берытске.
10Ошмесъёсты нёжалэ лэзид, гурезьёс вискытӥ [вуос] бызё.
11Соос вань луд пӧйшуръёсты вуэн люктало;
кыр ишакъёс асьсэлэсь сюзэс юзмато.
12Соос вӧзын ин тылобурдоос уло,
улвайёс пушкысен куаразэс потто.
13Аслад ӝужыт интыысеныд гурезьёсты люктаськод,
ужъёсыдлэн емышъёсынызы музъем тыр луэ.
14Музъемысь сиён поттӥськод:
пудоослы – турын, адямиослы сиыны юос будэтӥськод.
15Адямилэсь сюлэмзэ шулдыр карыны вина сётӥськод,
ымнырзэ чилясь карыны вӧй поттӥськод,
адямилэсь сюлэмзэ юнматыны нянь вайиськод.
16Кузё-Инмарлэн писпуосызлэн,
Ливанысь мерттэм кедырпуосызлэн, сюзы юзма.
17Соос вылэ тылобурдоос кар лэсьто:
аистъёслэн корказы – кыз йылын,
18пужейёслэн – ӝужыт гурезьёсын,
луд кечъёслэн пегӟон интызы – из люкъёс.
19Вадесъёсты тодон понна Со толэзез кылдытӥз;
шунды аслэсьтыз пуксён палзэ тодэ.
20Тон пеймытэз вӧлдӥськод но, уй луэ,
со дыре вань нюлэс пӧйшуръёс калгыса ветло.
21Сьӧсь пӧйшуръёс сиён утчаса вузо, Инмарлэсь асьсэлы сиён куро.
22Шунды ӝужа но, соос люкасько, гутёосазы выдыло.
23Адями аслаз ужаз мынэ, ӝытозьлы аслаз удысаз ужаны потэ.
24Туж паймымонэсь Тынад ужъёсыд, Кузё-Инмаре!
Котьмае но Тон визьмын кылдытэмед;
музъем тырмемын Тынад кылдытэм макеосыныд.
25Тани зарезь – туж быдӟым но паськыт:
отын лыдъяса быдтонтэм вырисьёсыз –
пичиосыз но, быдӟымъёсыз но улэп макеос.
26Отӥ быдӟымесь пыжъёс уяло,
левиафан но, кудзэ Тон отын шудон понна кылдытӥд.
27Ваньзы соос витё Тынэсьтыд ас дыраз сиён сётэмдэ.
28Сётӥськод соослы – басьто; кидэ мычиськод – кӧтсы ӟеч тыре.
29Ымнырдэ ватӥськод ке, куалекъяло,
лулзэс басьтӥськод ке, куло, сюязы берытско.
30Шокан сётӥськод ке, улон кылдэ, музъем вылэз выльдӥськод.
31Пумтэм вапумъёсы Кузё-Инмар дано мед луоз!
Аслаз ужъёсыз понна Кузё-Инмар мед шулдыръяськоз!
32Музъем шоры учке но – со зурка,
гурезьёс борды йӧтӥське но – соос ӵын потто.
33Быдэс улонэ ӵоже Кузё-Инмарез данъяса кырӟало,
вань улытозям Инмарез ушъяса кырӟало.
34Кырӟанэ-веранэ Солы ярамон мед луысал;
Кузё-Инмар бордын шулдыръясько.
35Сьӧлыкоос музъем вылысь мед бырозы,
законлы пумит улӥсьёс азьланяз медаз ни луэ.
Эй, лулы, Кузё-Инмарез данъя!
Аллилуия!
Глава 103
