Choose Language
Old Testament Books
New Testament Books
1Кузё-Инмарез данъялэ, Солэн нимызлы вазиське,
калыкъёс пӧлын Солэн ужъёсыз сярысь ивортэ.
2Солы ушъян гуръёс кырӟалэ, кырӟалэ Солы;
Солэн вань паймымон ужъёсыз сярысь ивортэ.
3Солэн дун-чылкыт нимыныз ушъяське;
Кузё-Инмарез утчасьёслэн сюлэмзы мед шумпотоз.
4Утчалэ Кузё-Инмарез, Солэсь кужымзэ,
ялан Солэсь ымнырзэ утчалэ.
5-6Тӥ, Солэн ляльчиезлэн, Авраамлэн, выжыез, Иаковлэн пиосыз,
Солэн быръемъёсыз, тодады вае Солэсь лэсьтэм паймымон ужъёссэ,
паймымон тодметъёссэ, ымысьтыз потэм курон-косонъёссэ.
7Со – Кузё-Инмар, асьмелэн Инмармы,
быдэс дунне понна Солэн курон-косонъёсыз.
8Пырак ӵоже тодаз возе Аслэсьтыз сӥзёнзэ,
сюрс выжыослы возьыны косэм кылзэ.
9Сое Со Авраамлы сӥзиз, Исаак азьын кыл сётӥз.
10Сое Со Иаковлы закон карыса пуктӥз,
Израильлы пумтэм вапумъёс ӵожелы сӥзён кариз.
11«Тыныд Ханаан музъемез люкетлы сёто», – Со шуиз.
12Соку соос лыдзыя ӧжыт на вал, туж ӧжыт,
соос отын лыктэм калык вал,
13одӥг калык дорысь мукет калык доры выжылӥзы,
одӥг эксэйлыкысь мукет выжыос доры вуылӥзы.
14Кузё-Инмар нокинлы соосты ултӥяны ӧз лэзьы,
соос понна эксэйёсты куаретылӥз:
15«Эн йӧтӥське Мынам вӧйын зырӟемъёсы борды,
пророкъёсылы уродзэ эн лэсьтэ».
16Музъем вылэ сютэм ар лэзиз, вань ю-нянь модосъёсты быдтӥз.
17Соослэн азязы адямиез ыстӥз –
ляльчи карыны вузамын вал Иосиф.
18Жильыосын дурылӥзы солэсь пыдъёссэ,
корт пушкы сюриз солэн улонэз.
19Солэн верам кылыз быдэсмытозь,
Кузё-Инмарлэн кылыз сузяз-чылкытатӥз сое.
20Эксэй ыстӥз сое эрике поттыны,
калыкъёсты киулаз возись мозмытӥз сое.
21Сое ас юртэзлы кузё карыса пуктӥз,
аслаз ваньбурезлы кивалтӥсь кариз,
22аслыз кызьы кулэ, озьы кузёйыръёсызлы мед валэктоз,
тӧрооссэ визьлы мед дышетоз шуыса.
23Соку Израиль Египетэ лыктӥз,
Иаков Хамлэн музъемаз улыны выжиз.
24Инмар Ас калыксэ трослы йылэтӥз,
тушмонъёсыз сярысь сое кужмогес кариз.
25Соослэн сюлмазы Ас калыкезлы пумит
адӟемпотостэм карон ӝуатӥз,
ляльчиосызлы пумит лек уж лэсьтыны малпан сётӥз.
26Аслэсьтыз ляльчизэ Моисеез ыстӥз,
быръем муртсэ Ааронэз отчы ыстӥз.
27Египет калык пӧлын, Хамлэн музъемаз,
Инмарлэсь паймымон тодметъёссэ,
паймымон ужъёссэ соос возьматӥзы.
28Инмар пеймытэз ыстӥз но тём-тём пеймыт кариз,
Солэн кылызлы ӧз ни пумитъяське.
29Вузэс вирлы пӧрмытӥз, чорыгзэс быдтӥз.
30Музъемзы эбекъёсын шобырскиз,
эксэйёссылэн кӧлан интыязы но соос пыризы.
31Инмар косӥз но, соослэн быдэс музъемазы
пӧртэм нымы-кибыос, вир юись чибиньёс лыктӥзы.
32Зорез йӧзорлы пӧрмытӥз, музъем вылазы ӵушкась тыл кенжытӥз.
33Виноградзэс, смоквапуоссэс йӧзорен шуккиз,
музъем вылысьтызы писпуосты погыръяз.
34Инмар вераз но, саранча вуиз,
лыдъяса быдтонтэм гоно нумыръёс лыктӥзы.
35Соослэн музъем вылысьтызы вань турынэз сиизы,
бусыысьтызы емышъёсты ньылӥзы.
36Музъем вылысьтызы котькудзэ нырысетӥ вордскем нуныез –
вань кужымзылэсь кутсконзэ – быдтӥз.
37Израиль адямиосты азвесен но зарниен поттӥз,
соослэн выжыязы катьтэммем мурт ӧй вал.
38Соослэн кошкемзылы Египет шумпотӥз,
уго соосын сэрен Египет кышкаса-куалекъяса улоно луиз.
39[Соослы] шобретлы пилемез возъяз, уйёсы югдытыны тыл сётӥз.
40Куризы но – бӧдёноосты ыстӥз,
инмысь нянен соослэсь кӧтсэс тырылӥз.
41Изэз вайяз но – вуос бызьыны кутскизы,
кӧс интыостӥ шур кадь вуос бызьыны кутскизы.
42Уго Со тодаз вайиз
Аслаз ляльчиезлы, Авраамлы, верам святой кылзэ,
43Аслэсьтыз калыксэ шумпоттыса,
быръем адямиосызлы шулдыр мылкыд сётыса поттӥз.
44Мукет калыкъёслэсь музъемъёссэс соослы сётӥз,
мурт выжыослэсь ужам ужзэс люкетлы басьтӥзы,
45Солэсь пуктон-косонъёссэ мед чаклалозы,
Солэсь законъёссэ мед утёзы шуыса.
Аллилуия!
Глава 104
