Bible
Choose Language
Old Testament Books
New Testament Books
ПСАЛТИРЬ
102-тӥ ПСАЛОМ
Давидлэн крезьгурез.
1Эй, лулы, Кузё-Инмарез данъя,
пушкы-сюлмы, Солэсь дун-чылкыт нимзэ данъя.
2Эй, лулы, Кузё-Инмарез данъя, одӥгзэ но ӟеч ужзэ эн вунэты.
3Со тынэсьтыд законлы пумит улэмъёстэ ваньзэ куштэ,
вань висёнъёстэ бурмытэ,
4сисьмон-быронлэсь улондэ мозмытэ,
гажан-жалянэныз, шырыт сямыныз тонэ шобыртэ,
5вань кулэ каронъёстэ быдэстэ, егит дырыд ӧрӟилэн кадь выльдӥське.
6Вань ултӥям-сантэмамъёслы Кузё-Инмар
шонерлык, утиськон сётэ.
7Сюресъёссэ Со Моисейлы возьматӥз,
Аслэсьтыз ужъёссэ Израиль пиослы усьтӥз.
8Шырыт сямо, гажась-жалясь, кема чидась,
туж ӟечлыко Кузё-Инмар.
9Ялан вожзэ поттыса,
пумтэм дауръёс ӵоже йыркуръяськыса, Со уг улы,
10законлы пумит улэмъёсмы понна вӧсь ӧз кары,
сьӧлыкъёсмы понна пунэмзэ ӧз берыкты.
11Макем ӝужыт музъемысен инбам,
сокем ик быдӟым [Кузё-Инмарлэн] гажан-жалянэз
Солэсь кышканэн улӥсьёс понна.
12Макем кыдёкын шундыӝужан шундыпуксёнысен,
сокем кыдёке законлы пумит улэмъёсмес Со палэнтӥз.
13Кызьы атай аслэсьтыз пиоссэ гажа-жаля,
озьы Кузё-Инмар Солэсь кышкасьёсты гажа-жаля.
14Уго Со асьмелэсь марлэсь кылдэммес тодэ,
асьмеос сюй-тузон луиськомы шуыса, Со тодаз возе.
15Адямилэн улоно нуналъёсыз турын-куар кадь,
бусыын будӥсь сяська кадь, озьы со сяськая.
16Со вылтӥ тӧл пельтэ но – со ӧвӧл ни,
солэн улон интыез уз тодма ни сое.
17Нош Кузё-Инмарлэн гажан-жалянэз
Солэсь кышканэн улӥсьёс понна
вапумъёсысь вапумъёсы улэ,
18Солэн шонерлыкез сӥзён-косонзэ утись,
курон-косонъёссэ быдэсъясь пиослэн пиоссы вылын возиське.
19Кузё-Инмар престолзэ инме пуктӥз,
эксэй луыса, ваньмыныз кивалтэ.
20Юн кужмоесь, кыл-куараезлы тэрытскыса,
Солэсь верам кылзэ быдэсъясь [вань] Кылчинъёсыз,
Кузё-Инмарез данъялэ.
21Кузё-Инмарлэн вань воинъёсыз, ужась-тыршисьёсыз,
эриксэ быдэсъясьёсыз, Кузё-Инмарез данъялэ.
22Солэн вань кузёяськон интыосысьтыз,
Солэн вань ужъёсыз, Кузё-Инмарез данъялэ.
Эй, лулы, Кузё-Инмарез данъя!
Глава 102
